Shavkat Mirziyoyev Nyu-Yorkda Kristin Lagardni qabul qildi

O‘zbekiston Respublikasi Prezidenti Shavkat Mirziyoyev 19 sentabr kuni Nyu-York shahrida Xalqaro valyuta jamg‘armasi farmoyish beruvchi direktori Kristin Lagardni qabul qildi. 

O‘zA xabariga ko‘ra, davlat rahbari ushbu uchrashuvdan mamnunligini bildirib, Xalqaro valyuta jamg‘armasi jahon iqtisodiyotidagi vaziyatning yaxshilanishida muhim o‘rin tutayotganini ta'kidladi. 

Jamg‘arma mamlakatimizda amalga oshirilayotgan iqtisodiy islohotlarni qo‘llab-quvvatlamoqda. Joriy yil may oyida O‘zbekiston delegatsiyasi Xalqaro valyuta jamg‘armasida valyuta siyosatini isloh qilish bo‘yicha uchrashuv o‘tkazdi. Iyul va sentabr oylarida Jamg‘arma ekspertlari O‘zbekistonga tashrif buyurib, vazirlik va idoralarda iqtisodiy islohotlar bo‘yicha fikr almashdi. 

Jamg‘arma farmoyish beruvchi direktori 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasiga muvofiq iqtisodiy va tarkibiy islohotlar muvaffaqiyatli amalga oshirilayotgani bilan davlatimiz rahbarini qutladi. 

Prezidentimizning 2017 yil 2 sentabrdagi «Valyuta siyosatini liberallashtirish bo‘yicha birinchi navbatdagi chora-tadbirlar to‘g‘risida»gi farmoniga muvofiq valyuta muomalasida bozor mexanizmlari joriy etilgani sohadagi ma'muriy to‘siqlarni bartaraf etdi, biznes vakillari uchun teng sharoitlar yaratdi. 

Kristin Lagard Shavkat Mirziyoyev rahbarligida O‘zbekistonda amalga oshirilayotgan keng ko‘lamli islohotlar jarayonida iqtisodiyot va ijtimoiy hayot barqarorligini ta'minlashga alohida e'tibor qaratilayotgani diqqatga sazovor ekanini ta'kidladi. 

Uchrashuvda valyuta islohoti jarayonida davlat organlari va tijorat banklarini qo‘llab-quvvatlash, savdodagi tariflarni kamaytirish, ijtimoiy himoyaga muhtoj aholini muhofaza qilish bo‘yicha amalga oshirilgan ishlar haqida so‘z yuritildi. Davlat byudjyetini profitsit bilan bajarish, soliq ma'murchiligi va davlat statistikasi sohasini tubdan yaxshilash, bank tizimining barqarorligini ta'minlash, tashqi savdo siyosatini erkinlashtirish kabi navbatdagi vazifalarga e'tibor qaratildi. 

O‘zbekiston bilan Xalqaro valyuta jamg‘armasi hamkorligini kengaytirish, mamlakatimizda ishbilarmonlik va investitsiya muhitini takomillashtirish masalalari bo‘yicha fikr almashildi. 

Kristin Lagard Xalqaro valyuta jamg‘armasi texnik ko‘maklashish va iqtisodiy siyosat masalalari bo‘yicha tavsiyalar berish orqali O‘zbekiston moliya tizimida amalga oshirilayotgan chora-tadbirlarni qo‘llab-quvvatlashga tayyorligini bildirdi.