Ichki ishlar organlari xodimlarini mukofotlash va maoshidan pul ushlab qolish mezonlari tasdiqlandi

Vazirlar Mahkamasining 22.02.2018 yildagi 137-son qarori bilan Biriktirilgan hududda ichki ishlar organlarining huquqbuzarliklar profilaktikasi va jinoyatchilikka qarshi kurashish bo‘yicha faoliyatini baholash tartibi to‘g‘risidagi nizom tasdiqlandi, deb xabar bermoqda Norma.uz.

Tasdiqlangan mezonlardan kelib chiqqan holda profilaktika inspektorlari va tezkor xodimlarga nisbatan bir martalik pul ushlash va mukofotlash qo‘llaniladi. Ushlanmaning ham, mukofotning ham eng yuqori miqdori xodim lavozim maoshining 50%ini tashkil etadi.

Bir martalik pul ushlanishi intizomiy jazo chorasi hisoblanmaydi va uning qo‘llanishi intizomiy jazo chorasini qo‘llash bilan bog‘liq oqibatlarga olib kelmaydi. Xodim avval intizomiy jazoga tortilganligiga asoslanib bir martalik pul ushlanishini qo‘llashga yo‘l qo‘yilmaydi.

Pul mukofoti rag‘batlantirish chorasi hisoblanmaydi va xodimning amaldagi intizomiy jazosi mavjudligiga qaramasdan qo‘llanadi.

Bir martalik pul ushlanishi va mukofotlashni qo‘llash to‘g‘risidagi qarorlar Qoraqalpog‘iston Respublikasi IIV, viloyatlar IIB va Toshkent shahar IIBBda tashkil etiladigan maxsus komissiya tomonidan qabul qilinadi. Komissiyaning hisobot choragidan keyingi hisobot choragining birinchi oyi 15 sanasidan kechiktirmay o‘tkaziladigan majlislarida o‘tgan chorakdagi IIO xodimlarining faoliyati baholanadi.

Hujjat 23.02.2018 yildan kuchga kirdi.