Kofi Annan vafot etdi

Birlashgan Millatlar Tashkilotining sobiq bosh Kotibi Kofi Annan 80 yoshida vafot etdi. Bu haqda BMTning Migratsiya bo‘yicha tashkiloti Twitter’dagi o‘z mikroblogida xabar berdi.

«Bugun biz buyuk inson, yetakchi va vizioner - BMT sobiq bosh kotibi Kofi Annan oramizni tark etganidan chuqur qayg‘udamiz», - deyiladi tashkilot xabarida.

Kofi Annan 1938 yil 8 aprelda Oltin Qirg‘oq (hozirgi Gana) ingliz koloniyasi hududida viloyat gubernatori, Fante qabilasi yetakchisining merosxo‘ri oilasida tug‘ilgan.

Otasi o‘g‘lining kelajagiga katta ta'sir ko‘rsatdi va Kofining Ganadagi Kumasi Ilmiy-texnika universiteti ta'lim olishiga yordam berdi. O‘qishni tugatgan Kofi iqtisod bilan shug‘ullana boshlagan, so‘ng AQShning Minnesota shtati Sent-Pole shahridagi Makalester kollejiga ko‘chib o‘tgan.
 
Shu yillar mobaynida Kofi ilmiy tadqiqotlar olib borishga va ilmiy darajaga ega bo‘lishga qaror qiladi, shuning uchun u Jyenevadagi (Shveytsariya) Xalqaro muammolarni o‘rganish bo‘yicha oliy instituti aspiranturasiga kiradi.

Oradan 10 yil o‘tgach, Kofi Annan Sloun stipendiyasini oldi hamda Massachusets texnologiyalar institutiga yo‘l oldi. U yerda Annan boshqaruv bo‘yicha magistr darajasini oldi.

Shundan so‘ng, Kofi Annan Birlashgan Millatlar Tashkiloti tizimiga ishga o‘tdi. U Jyenevada Jahon sog‘liqni saqlash tashkilotida ma'muriy va byudjyet masalalar bilan shug‘ullandi.

Ushbu lavozimidan so‘ng, u Adis-Abebe (Efiopiya)da Birlashgan Millatlar Tashkilotining Afrika uchun iqtisodiy komissiyasida, Ismoiliyada (Misr) Birlashgan Millatlar Tashkilotining Shoshilinch kuchlari tarkibi a'zosi, Birlashgan Millatlar Tashkilotining Jyenevadagi Qochqinlar ishi Oliy Komissariyatida mehnat qildi. Keyinchalik Nyu-Yorkdagi (AQSh) Birlashgan Millatlar Tashkilotining bosh qarorgohida bosh kotib o‘rinbosari sifatida xizmat qildi.

Kofi Annan 1997-2006 yillarda BMTning yettinchi bosh kotibi bo‘lgan, 2001 yilda Inson huquqlari sohasidagi sa'y-harakatlari uchun Nobel mukofoti bilan taqdirlangan. 

Kofi Annan 2002 yilda O‘zbekistonga uch kunlik tashrif bilan kelib, mamlakat birinchi prezidenti Islom Karimov bilan muzokaralar o‘tkazgan.