Botir Zokirov rasman Qurilish vaziri bo‘ldi

O‘zbekiston Respublikasi Prezidentining 2019 yil 31 avgustdagi PF-5807-sonli Farmoniga muvofiq, Botir Irkinovich Zokirov O‘zbekiston Respublikasi Qurilish vaziri lavozimiga tasdiqlandi va shu munosabat bilan O‘zbekiston Respublikasi Qurilish vazirining birinchi o‘rinbosari lavozimidan ozod etildi.

Botir Zokirov – 2018 yil aprelidan buyon Qurilish vazirining birinchi o‘rinbosari edi.

Botir Zokirov 1963 yilning 28 iyulida Toshkent shahrida tug‘ilgan. Toshkent politexnika institutini (hozirgi Toshkent davlat texnika universiteti) quruvchi-muhandis mutaxassisligi bo‘yicha tamomlagan.

1980 yilda Toshkent instrumental zavodida mehnat faoliyatini boshlagan. 1985-1990 yillarda «Toshsantexmontaj» trestida ishlagan. 1990 yilda esa «12-trest» qurilish shirkatida ish boshlab, bu yerda chilangarlikdan boshqaruv kengashi raisi lavozimigacha ko‘tarilgan. 2011 yilda O‘zbekiston Respublikasi Prezidentining farmoni bilan O‘zbekiston Respublikasi Bosh vaziri o‘rinbosari – O‘zbekiston Respublikasi Davlat arxitektura va qurilish qo‘mitasi raisi etib tayinlangan.

O‘zbekiston Respublikasi Prezidentining 2016 yil 14 dekabrdagi PF-4877-son farmoniga muvofiq Botir Zakirov Davlat arxitektura va qurilish qo‘mitasi raisi lavozimiga tasdiqlangandi.

Eslatib o‘tamiz, 29 avgust kuni Oliy Majlis Qonunchilik palatasining navbatdagi majlisida deputatlar yangi tarkib topgan amaliyotga ko‘ra, hukumat a'zoligiga tayinlanayotgan nomzodni ko‘rib chiqishgan, Vazirlar Mahkamasi tomonidan Qurilish vaziri lavozimi uchun taqdim etilgan Botir Erkinovich Zokirov nomzodi deputatlar tomonidan ma'qullangandi.

Qurilish vazirligi 2018 yilning 2 aprel kuni  prezidentning «Qurilish sohasida davlat boshqaruvi tizimini tubdan takomillashtirish chora-tadbirlari to‘g‘risida»gi farmoni bilan tashkil etilgandi. O‘shanda vazirlikka Olmazor tumani hokimi bo‘lib turgan Abduqahhor To‘xtayev (2005-2011 yillarda Toshkent shahri hokimi bo‘lgan) yangi rahbar etib tayinlangandi. U 2019 yilning mayida lavozimdan ozod etilib, Toshkent shahrining Shayxontohur tumani hokimi lavozimiga o‘tkazildi.