«Hududlarga ortiqcha yuk bo‘lib, pul tushirish, yig‘ish degan masalalar to‘g‘risida gap bo‘lishi mumkin emas» – Moliya vaziri o‘rinbosari

Tadbirda moliya vazirining o‘rinbosari Yorqin Tursunov Sardobada uylar qurilishi ishlari qaysi manbalar hisobidan amalga oshirilishi haqida gapirdi.

“Fuqarolar, bloger, jurnalistlarimizda [uylar qurilishiga] viloyatlar jalb qilingan, bu homiylik hisobidan bo‘ladimi, degan savol bo‘lmasligi kerak. Bu maqsad uchun respublika budjetidan Mahalla xayriya jamg‘armasiga 70 mlrd so‘m ajratdik. 14ta hududga 5 mlrd so‘mdan mablag‘ chiqarib berildi. Mahalla xayriya jamg‘armasida yig‘ilgan boshqa homiylik mablag‘lari ham shunga yo‘naltiriladi. 

Aytmoqchimanki, hududlarga ortiqcha yuk bo‘lib, bunga pul tushiringlar, yig‘ish degan masalalar to‘g‘risida gap bo‘lishi mumkin emas. Chunki buni muhtaram prezidentimiz alohida ta'kidladilar: “Sizlar ishni bajarib berasizlar, davlat pulini to‘lab beradi”. 

Bu jarayonda hali qancha mablag‘ ketishi aniq emas. Uylarga qanchalik zarar yetganlik darajasini mutaxassislar o‘rganishyapti. Aniq bo‘lganidan keyin mablag‘ doirasida bu ishlar to‘liq amalga oshirib beriladi”, - dedi Yorqin Tursunov.