Jizzaxda IIB xodimi o‘ziga o‘q uzib, vafot etgani ma'lum bo‘ldi

Viloyat prokuraturasi axborot xizmati xabariga ko‘ra, «Huquq va iste’molchi» gazetasida bu haqda tegishli maqola e'lon qilingan.

Qayd etilishicha, 2020 yil 29 avgust kuni soat taxminan 09:40larda Do‘stlik tuman IIB ma'muriy binosining nazorat o‘tkazish punktida xizmatga jalb qilingan tuman IIB xodimi bo‘lgan marhum Sh.B. o‘ziga biriktirilgan “Makarov” nomli 7230-raqamli jangovar qurol bilan ko‘krak qismiga bir marotaba o‘q uzib, tan jarohati olgan.

Jizzax viloyati prokuraturasi ma'lumotiga ko‘ra, Do‘stlik tuman IIB xodimi tuman tibbiyot birlashmasi jonlantirish bo‘limiga yotqizilgan.

“Tuman tibbiyot birlashmasi xodimlari tomonidan ko‘rsatilgan tez tibbiy yordamlarga qaramasdan, Sh.B. soat 10:30larda vafot etgan”, deyiladi xabarda. 

Ma'lum qilinishicha, mazkur holat yuzasidan tergov harakatlari davom etmoqda.

Avvalroq, Farg‘onada Milliy gvardiya xodimi xizmat mashinasida odam urib yuborgani, jabrlanuvchi vafot etgani xabar berilgandi.