Qator oziq-ovqat mahsulotlariga berilgan QQS imtiyozlarining muddati uzaytiriladi
Go‘sht, kartoshka, o‘simlik yog‘i kabi mahsulotlar importiga berilgan QQS imtiyozlari 2022 yil 30 aprelga qadar uzaytirildi.
Oliy Majlis Qonunchilik palatasining 11 yanvar kungi majlisida «O‘zbekiston Respublikasi Soliq kodeksining 483-moddasiga asosiy turdagi oziq-ovqat mahsulotlari narxlari barqarorligini ta’minlashga qaratilgan o‘zgartish kiritish to‘g‘risida»gi qonun loyihasi ikkinchi o‘qishda qabul qilindi.
Qayd etilishicha, 2022 yil 30 aprelga qadar quyidagilar QQSdan ozod qilinadi:
- O‘zbekiston Respublikasi hududiga o‘simlik yog‘i, kungaboqar va zig‘ir urug‘i, shuningdek, soya danagini olib kirish;
- o‘simlik yog‘ini (paxta yog‘idan tashqari) ishlab chiqarish va (yoki) realizatsiya qilish bo‘yicha aylanma;
- go‘sht (mol, qo‘y, tovuq), tirik hayvonlar (qoramol va parranda) va ularni so‘yishdan olingan mahsulotlarni, kartoshkani hamda muzlatilgan baliqni realizatsiya qilish bo‘yicha aylanma, shuningdek, ularni mamlakat hududiga olib kirish.
Mazkur qonun loyihasining qabul qilinishi aholini asosiy oziq-ovqat mahsulotlari bilan to‘laqonli va uzluksiz ta’minlashga, narx barqarorligini saqlashga, aholi daromadlari oshishiga xizmat qilishi ta’kidlab o‘tilgan.
Ma’lumot uchun, kungaboqar va soya urug‘lari hamda o‘simlik yog‘i importi, shuningdek, o‘simlik yog‘ini ishlab chiqarish va ichki bozorda realizatsiya qilish 2021 yil 1 maydan 31 dekabrgacha, go‘sht (mol, qo‘y, tovuq), tirik hayvonlar (qoramol va parranda) va ularni so‘yishdan olinadigan mahsulotlarni, kartoshkani hamda muzlatilgan baliqni realizatsiya qilish bo‘yicha aylanma, shuningdek, ularni mamlakatga olib kirish 10 oktyabrdan 31 dekabrgacha qo‘shilgan qiymat solig‘idan ozod qilingan edi.
Mavzuga oid
08:40 / 09.09.2024
Eksport qiluvchilar uchun QQS qoplash tartibi soddalashtirildi
13:50 / 05.09.2024
XMT loyihalariga yetkazilgan tovarlar uchun mahalliy ishlab chiqaruvchilarga QQS qaytariladi
07:53 / 04.09.2024
Ayrim tadbirkorlarga QQSning bir qismi qaytariladi
10:30 / 02.09.2024