Putinning yonida yangragan bayonot: To‘qayev Qozog‘iston “DXR” va “LXR”ni tan olmasligini aytdi

To‘qayev bu haqda Rossiya prezidenti Vladimir Putinning yonida, rossiyalik mediamenejyer Margarita Simonyan bergan savolga javoban ma’lum qildi.

Simonyan To‘qayevdan Rossiya Ukrainada o‘tkazayotgan “maxsus harbiy amaliyot” bo‘yicha fikri va bu borada Qozog‘istonda nima deb o‘ylashayotgani haqida so‘radi.

“Buni ochiq aytaman, har xil fikrlar bor. Jamiyatimiz ochiq, bizda fuqarolik jamiyati yetilgani yaqqol ko‘zga tashlanadi. Shuning uchun har xil fikrlar bildirilyapti.

Men shuni aytishni istardimki, zamonaviy xalqaro huquq bu – BMT Nizomidir. Nizomdagi asosiy prinsiplardan ikkitasi hozirda bir-biriga qarama-qarshi bo‘lib qolgan. Bu – davlatlarning hududiy yaxlitligi va millatlarning o‘z taqdirini o‘zi belgilash huquqi.

BMTning barcha asoschilari o‘z vaqtida bunga e’tibor qaratishmagan ko‘rinadi. Balki atayin qilishgandir, bu ikkita prinsip hozirda bir-birini inkor qilmoqda.

Fikrlar har xil. Ayrimlar davlatlarning hududiy yaxlitligi muqaddas tushuncha deb hisoblashadi, boshqalar esa u yoki bu davlat tarkibidagi millatlar o‘z davlatiga ega bo‘lish va ajralib chiqish huquqiga ega deyishadi.

Lekin, umuman olganda, agar millatlarning o‘z taqdirini o‘zi belgilash huquqi butun Yer sharida amalda ishlasa, hozir BMT tarkibiga kiruvchi 193ta davlat o‘rnida 500 yoki 600tadan ko‘p davlat paydo bo‘ladi. Albatta, bu xaosni keltirib chiqaradi.

Shu sababli ham biz na Tayvanni, na Kosovoni, na Janubiy Osetiyani, na Abxaziyani tan olamiz. Shu prinsip, bizning fikrimizcha, Lugansk va Donetsk kabi kvazidavlat hududlariga ham taalluqlidir. Bu – sizning ochiqchasiga bergan savolingizga ochiqchasiga javob”, dedi To‘qayev.

Simonyan Qozog‘iston prezidentiga bu ochiqcha javob uchun minnatdorlik bildirdi.