2023 yilning ilk choragida IT-xizmatlar eksporti 3 baravardan ziyod oshdi

Masalan, joriy yilning 1-choragi yakunlari bo‘yicha rezidentlar tomonidan ko‘rsatilgan xizmatlarning umumiy hajmi 2 381 mlrd so‘mni tashkil etdi. O‘tgan yilning mos davriga nisbatan IT Park rezident kompaniyalari tomonidan ko‘rsatilgan xizmatlar hajmi 292 foizga oshdi. Taqqoslash uchun, 2021 yilning 1-kvartalidagi ma’lumotlar 438,6 milliard so‘mni, 2022 yilda esa 814 milliard so‘mni tashkil etgan.

Yo‘nalishlar bo‘yicha ko‘rsatkichlar:

- dasturlash – 1 358,4 mlrd so‘m;

- qayta ishlash – 839,9 mlrd so‘m;

- ta’lim – 25,6 mlrd so‘m;

- BPO – 157,1 mlrd so‘m.

IT Park rezidentlari eksporti hajmi o‘tgan yilning 1-choragiga nisbatan 327 foizga oshib, 57,2 million dollarni tashkil etdi. Ulardan 48 foiz qismi AQShga, qolganlari esa Buyuk Britaniya (15 foiz), Singapur (10 foiz), MDH mamlakatlari (10 foiz) va boshqalarga (17 foiz) to‘g‘ri keladi. 2023 yil oxiriga borib eksport hajmi 300 million dollarga yetishi kutilmoqda.

Joriy yilning birinchi choragida IT Park rezidentlari soni 1262 ta kompaniyani tashkil etdi.

Rezidentlarning asosiy ulushi quyidagi yo‘nalishlarda ishlaydi:

• dasturiy ta’minotni ishlab chiqish va qo‘llab-quvvatlash (61 foiz);
• ma’lumotlarni qayta ishlash (5 foiz);
• IT-ta’lim (20 foiz);
• BPO (14 foiz).

Bundan tashqari, taqdim etilayotgan imtiyozlar tufayli IT Park rezidentlari qo‘shimcha ish o‘rinlarini yaratib, mamlakatda IT-mutaxassislar sonini ko‘paytirishmoqda. Shunday qilib, joriy yilning 1-choragida rezident kompaniyalarda 2100 dan ortiq ish o‘rni yaratildi. Ishga joylashgan mutaxassislarning umumiy soni 20 000 nafardan oshdi, bu 2022 yil oxiridagi ko‘rsatkichga nisbatan 12 foizga ko‘pdir.

2023 yilning 1-kvartalida O‘zbekiston startaplari davlat organlaridan 17 milliard so‘mdan ortiq mablag‘ oldi. Shu bilan birga, Jizzaxdagi startaplar – 12 milliard so‘mdan ortiq, Navoiydagi loyihalar – 1,4 milliard so‘mdan ortiq va Buxorodagi startaplar – 1,3 milliard so‘mdan ortiq mablag‘ni qabul qilishdi. Joriy yilning 1-choragi uchun xorijiy moliyalashtirish summasi 1 million 904 ming dollarga yetdi.

2023 yil O‘zbekistonning bir necha startaplari xalqaro tanlovlarda g‘oliblikka erishishdi:

- O‘zbekistonning Tass Vision va Billz startaplari Silkway 2023 finalchilari bo‘ldi;

- Butunjahon hukumatlar sammiti doirasida BAA hukumati tomonidan tashkil etilgan Best Global M-Gov Award tanlovida O‘zbekiston nomidan qatnashgan “Donʼt waste” startapi ishtirokchilari 500 000 AED (136 000 AQSh dollari) miqdorida mukofot oldilar;

- “Plug and Play Uzbekistan” akseleratsiya dasturining birinchi to‘lqinida ishtirok etish uchun Sugʻurta Bozor, Paylov, Didox, Finiso.io, Smartup X, UYSOT, Ruby Fleyet, botcommerce, Beautify, Mazzami, Mohirdev, Monetary, Royal Taxi, Mento, TASS Vision, Pivot Ad kabi O‘zbekiston startaplari tanlab olindi, jami 120 dan ortiq startaplar ushbu dastur uchun ariza topshirdi.

Savodxonlik va umuman IT madaniyatini oshirishga yordam beradigan qator chora-tadbirlar amalga oshirildi. Xususan, 2023 yilning 1-kvartalida IT Park’ning 205 ta IT markazida 7395 nafar shaxs tahsil oldi, ulardan 2280 nafari davlat xizmatchilari, qolgan 5115 nafar shaxs esa 30 yoshgacha bo‘lgan yoshlardir.

Bundan tashqari, “One Million Uzbek Coders” loyihasining ikkinchi bosqichiga start berildi. Uning doirasida 1 milliondan ortiq kishi Coursera platformasidagi 240 dan ziyod yetakchi xalqaro kompaniyalar va ta’lim muassasalarining nufuzli IT kurslaridan foydalanish imkoniyatiga ega bo‘ladi. 

Shuningdek, joriy yilning birinchi choragida 111 nafar yoshlar xalqaro IT sertifikatlarini olish uchun qilgan xarajatlarini muvaffaqiyatli qoplay olishdi. Ularga jami 196 million so‘mdan oshiq mablag‘ to‘lab berildi. Shu bilan birga, kompensatsiyalangan xalqaro IT sertifikatlari ro‘yxati 184 tadan 216 taga ko‘paydi va hozirda ularning 139 tasi professional, 49 tasi o‘rta va 28 tasi boshlang‘ich sertifikatlardir.