Havayidagi o‘rmon yong‘inlari: qurbonlar soni 101 kishiga yetdi

AQShning Havayi shtatidagi Maui orolida sodir bo‘lgan o‘rmon yong‘inlari qurbonlari soni 100 kishidan oshdi. «101 kishi halok bo‘ldi», dedi 15 avgust, seshanba kuni gubernator Josh Grin.

Unga ko‘ra, tabiiy ofat hududining to‘rtdan bir qismidan ko‘prog‘i o‘rganilgan. Qutqaruvchilar yonib ketgan uylarning kullarini o‘rganib chiqmoqda, maxsus o‘qitilgan itlar esa jasad qoldiqlarini qidirishda yordam bermoqda. Grin yana qurbonlar soni ancha yuqori bo‘lishi va yaqin kunlarda ikki yoki uch baravar oshishi mumkinligi haqida ogohlantirdi.

AQShda so‘nggi yuz yildagi eng halokatli yong‘in 

Maui orolida bir hafta oldin sodir bo‘lgan yong‘in AQShda so‘nggi yuz yildagi eng halokatli fojia deb atalyapti. Tabiiy ofat tarixiy Laxayna shahrini vayron qildi: 2200 ta bino, asosan turar joy binolari butunlay yonib ketgan yoki shikastlangan, 850 gektar yer yonib kul bo‘lgan. Favqulodda vaziyatlarni boshqarish bo‘yicha federal agentlik Laxaynani tiklash 5,5 milliard dollarga tushishini taxmin qilmoqda. 

AQSh rasmiylarining fikricha, Maui orolidagi o‘rmon yong‘inining halokatli oqibatlari bir qator omillar, jumladan aloqa tizimidagi uzilishlar va tezligi soatiga 130 kmga yetgan kuchli shamollar bilan bog‘liq. 

Gubernator Josh Grin va Havayi shtati bosh prokurori Anne Lopez aholi yong‘in xavfi haqida o‘z vaqtida ogohlantirilganmi yoki yo‘qligini ko‘rib chiqishini ma’lum qildi. Reuters xabariga ko‘ra, yong‘in sodir bo‘lganda trevoga signali beruvchi sirenalar ishlamagan. Uyali aloqa tarmog‘idagi nosozlik va elektr energiyasidagi uzilishlar esa odamlarni xavf haqida boshqa yo‘l bilan ogohlantirishga imkon bermagan.