Kreml chetga ketib qolgan rossiyaliklarning barchasini ham ortga qabul qilishga tayyor emas

Rossiya Ukraina urushi boshlanganidan keyin mamlakatni tark etganlarning hammasini ham qaytarib olishga tayyor emas, dedi Rossiya prezidenti matbuot kotibi Dmitriy Peskov. «Dushmanga aylanganlar uchun bizning vatanimizda joy bo‘lmaydi», dedi u 11 sentabr, dushanba kuni RBK’ga bergan intervyusida. Shu bilan birga, uning so‘zlariga ko‘ra, bu odamlarning sonini «bo‘rttirib ko‘rsatmaslik kerak».

Peskov: Ketganlar qaytishni xohlab qoladi 

Peskov xorijda yashayotgan rossiyaliklar ertami-kechmi qaytishni boshlashiga ishonch bildirdi. Bu «bizning o‘sib borayotgan bozorimiz ushbu odamlar chiqib ketgan ko‘plab mamlakatlardagi salbiy iqtisodiy tendensiyalar fonida jozibador bo‘lib borayotgani sababli sodir bo‘ladi», dedi Kreml vakili. Iqtisodiyot ko‘plab jarayonlarning markazida va Rossiyadagi iqtisodiy vaziyat «yomon emas», deydi u. 

Ketgan rossiyaliklarni qaytarish bo‘yicha hukumat choralari imkoniyati haqida so‘ralganda, Peskov «bu faqat bizning mamlakatimizning jozibadorligi ko‘rinishida bo‘lishi mumkin», deb javob berdi. 

2022 yilda Rossiyadan fuqaro chiqib ketishining ikkita keng ko‘lamli to‘lqini kuzatildi - to‘liq miqyosli harbiy harakatlar boshlanganidan so‘ng, qish oxiri va erta bahorda, shuningdek, safarbarlik e’lon qilinganidan keyin, kuzda. Rasmiylarda ketganlar soni haqida aniq ma’lumotlar yo‘q. Dekabr oyida Raqamli rivojlanish vazirligi rahbari Maqsud Shadayev Davlat dumasidagi hukumat soatida Rossiyani tark etgan 100 ming IT-mutaxassislar haqida ma’lum qildi, bu umumiy xodimlar sonining taxminan 10 foiziga teng.