Isroilda HAMAS hujumi oqibatida halok bo‘lganlar soni 600 dan oshdi

Ikki mingdan oshiq kishi yaralangan.

Foto: Getty Images

HAMAS a’zolari 7 oktyabr kuni tongida Isroilga qilgan hujum oqibatida halok bo‘lganlar soni 600 nafarga yetgan, yana ikki mingdan ortiq kishi turli darajada tan jarohatlari olgan. Bu haqda Isroildagi Haaretz va Kan nashrlari xabar tarqatdi.

Bungacha Isroil mudofaa armiyasi qurbonlar soni 350 nafar atrofida deb xabar bergandi. Mahalliy manbalarga ko‘ra, so‘nggi soatlarda G‘azo bilan chegarada musiqa festivali o‘tkazilgan hududda 200 dan ortiq jasad topilgan.

Raqamlar yana o‘sishi mumkin.

Bundan tashqari, Isroil hududidan yuzdan ortiq kishi asir qilib olib ketilgan.

O‘z navbatida, Falastin sog‘liqni saqlash vazirligi harbiy harakatlar vaqtida 313 nafar falastinlik halok bo‘lib, ikki mingga yaqin kishi yaralangani haqida xabar bergan.

HAMAS harakati 7 oktyabr tongida Isroilga qarshi harbiy amaliyot boshladi. Isroil hududiga G‘azodan uch mingga yaqin raketa uchib kelgan, falastinliklar chegara hududlariga bostirib kirgan va isroillik harbiylar bilan qurolli to‘qnashuvlar boshlangan. Bunga javoban Isroil mudofaa armiyasi G‘azo bo‘lgasidagi nishonlarga yoppasiga zarba berishni boshladi.

#Isroil #Hamas

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.