Ukraina prezidenti: Hozir saylov o‘tkazish vaqti emas

Ukraina prezidenti Volodimir Zelenskiy 6 noyabr, dushanba kuni kechki videomurojaatida urush ketayotgan paytda saylov o‘tkazish to‘g‘ri emasligini aytdi. Zelenskiyning so‘zlariga ko‘ra, «hozir, urush davrida, ko‘p qiyinchiliklar bo‘lgan bir paytda, saylovlar mavzusini qandaydir tarzda jamiyatga beparvolik bilan tashlash mutlaqo mas’uliyatsizlikdir».

Ukraina jamiyati va davlati oldida turgan asosiy vazifa - «mudofaaga e’tibor qaratish», dedi Zelenskiy. «Ishonamanki, hozir saylov o‘tkazish vaqti emas», - deya ta’kidladi Ukraina prezidenti o‘z nutqi oxirida. Uning ta’kidlashicha, «agar u yoki bu siyosiy nizoga chek qo‘yib, hamjihatlikda ishlashni davom ettirish kerak bo‘lsa, davlatda nizolar va Ukrainaga qarshi kimningdir o‘yini uchun joy qolmasligi uchun barcha kerakli javoblarni berishga qodir tuzilmalar mavjud».

Ukrainadagi prezidentlik saylovlari 

Shu bilan birga, 11 oktyabr kuni e’lon qilingan Ruminiyaning digi24 axborot resursiga bergan intervyusida Zelenskiy urushdan keyin Ukraina prezidenti lavozimini tark etishini va urush davom etayotgandagina qayta saylanishga tayyorligini aytdi, chunki Rossiya o‘z mamlakatiga qarshi urush olib borayotgan paytda «uni tashlab keta olmaydi».

Avvalroq, avgust oyida Zelenskiy jurnalist Natalya Moseychuk bilan suhbatda Ukrainada urush davrida saylovlar o‘tkazish AQSh va Yevropa Ittifoqi Kiyevga saylov kampaniyasi va ovoz berishni moliyalashtirishda yordam bergan taqdirdagina mumkin bo‘lishini aytgan edi. Uning so‘zlariga ko‘ra, tinchlik davrida saylov o‘tkazish uchun taxminan 5 milliard grivna (taxminan 130 million yevro) kerak, biroq urush davrida aniq miqdorni aytish qiyin. 

Bundan tashqari, Ukraina prezidenti harbiy xizmatchilar, shuningdek, Yevropa mamlakatlari bo‘ylab tarqalib ketgan millionlab ukrainalik qochqinlar ovoz berishini ta’minlash zarurligini ta’kidladi. Shu bilan birga, Ukraina qonunchiligi saylovlarni harbiy holat sharoitida o‘tkazishni taqiqlaydi, deb eslatdi Zelenskiy.

Zelenskiyning vakolatlari 2024 yil bahorida tugaydi 

Avvalroq Ukrainada 29 oktyabrga belgilangan Oliy radaga saylovlar noma’lum muddatga qoldirildi, chunki Ukraina parlamenti harbiy holatni noyabr oyi o‘rtalarigacha uzaytirdi. Prezident saylovlari o‘tkazilishi ham tahdid ostida. Avgust oyida Kiyevga tashrif buyurgan amerikalik respublikachi senator Lindsi Grem mamlakat rasmiylarini 2024 yildan kechiktirmay prezidentlik saylovlarini o‘tkazishga chaqirgandi. 

45 yoshli Volodimir Zelenskiy 2019 yilda Petr Poroshenko o‘rniga Ukraina prezidenti lavozimiga saylangan. Uning prezidentlik vakolatlari navbatdagi muddati, Ukraina konstitutsiyasiga ko‘ra, kelasi yil bahorida tugaydi.