HAMAS garovga olinganlarning beshinchi guruhini ozod qildi

10 nafar isroillik Xalqaro Qizil Xoch qo‘mitasi xodimlariga topshirildi.

Foto: Reuters

28 noyabr kuni Falastinning HAMAS harakati Xalqaro Qizil Xoch qo‘mitasi xodimlariga garovga olinganlarning yana bir guruhini topshirdi. Bu haqda Interfax xabar berdi.

«HAMAS garovga olinganlarning beshinchi guruhini Qizil Xochga topshirdi», deyiladi xabarda.

Bu guruhda 10 nafar isroillik borligi avvalroq xabar qilingan edi.

O‘z navbatida, Haaretz gazetasi 28 noyabr kuni kechqurun Isroil qamoqxonalaridan 30 nafar falastinlik - 15 ayol va 15 bola ozod etilishi rejalashtirilganini xabar qildi.

Bir kun avval Isroil va HAMAS o‘rtasidagi sulh yana ikki kunga uzaytirilgan edi.

Isroil vazirlar mahkamasi tomonidan tasdiqlangan Isroil va HAMAS o‘rtasidagi kelishuvda sulhning maksimal muddati 10 kun bo‘lib, bu muddat davomida Isroil 300 mahbusni ozod qiladi.

Isroil matbuotiga ko‘ra, vaqtinchalik sulh kuchga kirgan paytdan beri 50 nafar isroillik va 150 nafar falastinlik dastlabki kelishuv shartlariga muvofiq ozod etilgan.

#Isroil #Falastin #Hamas

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.