Saida Mirziyoyeva: Alifbo masalasiga qat’iy nuqta qo‘yishimiz zarur

Jadidchilik mavzusidagi konferensiyada so‘zga chiqqan Saida Mirziyoyeva jamoatchilik e’tiborini “O‘zbekiston” so‘zi turli-tuman shakllarda yozilayotganiga qaratdi. “Gap Vatan va millat nomini to‘g‘ri yozish haqida ketar ekan, bunday bahs va tortishuvlarni bas qilishimiz, alifbodagi ayrim o‘zgarishlarni joriy etishimiz va shu bilan alifbo masalasiga qat’iy nuqta qo‘yishimiz zarur”, – dedi u.

O‘zbekiston prezidentining yordamchisi Saida Mirziyoyeva lotin yozuviga asoslangan o‘zbek alifbosini tezroq isloh qilishga chaqirdi. Bu haqda u Toshkentda “Jadidlar: milliy o‘zlik, istiqlol va davlatchilik g‘oyalari” mavzusida bo‘lib o‘tayotgan anjumandagi nutqida to‘xtalib o‘tdi.

“Bugun men juda dolzarb masalaga to‘xtalishni istardim. O‘tgan yillar davomida milliy alifboni isloh qilish masalasida ko‘plab fikrlar tinglandi, qizg‘in bahslar olib borildi. Ammo bir to‘xtamga kelinmadi. Bir misolga e’tiboringizni qaratsam, lotin yozuviga asoslangan alifbomizda hatto Vatanimiz nomi ham siz monitorda ko‘rib turganingizdek, turli joylarda turlicha yozilmoqda. Endi sizga savol bermoqchiman, monitorda O‘zbekiston so‘zining qaysi shakli to‘g‘ri? Ko‘rib turganingizdek, bir qarashda oddiy tuyulgan imlo belgisi butun boshli davlat va millatning nomi xato yozilishiga sabab bo‘lyapti.

Men buni tuzatish zarur bo‘lgan holat deb bilaman. Biz bunday masalalarda hadeb bahslashavermay, tezroq qaror qabul qilishimiz, yo‘l qo‘yilgan jiddiy xatoni zudlik bilan tuzatishimiz muhim deb hisolayman. Chunki gap bizning millatimiz, g‘ururimiz, yurtimiz nomi haqida ketyapti.

To‘g‘ri, alifbo islohoti, bahslar, tortishuvlar, ko‘zda tutilmagan moliyaviy xarajatlarni keltirib chiqarishi mumkin. Lekin yana bir bor ta’kidlayman, gap Vatan va millat nomini to‘g‘ri yozish haqida ketar ekan, bunday bahs va tortishuvlarni bas qilishimiz, alifbodagi ayrim o‘zgarishlarni joriy etishimiz va shu bilan alifbo masalasiga qat’iy nuqta qo‘yishimiz zarur deb hisoblayman”, – dedi Mirziyoyeva.

Eslatib o‘tamiz, lotin yozuviga asoslangan o‘zbek alifbosini isloh qilish masalasi bir necha yildan buyon qizg‘in bahs-munozaralar markazida bo‘lib kelmoqda.

Tilshunoslarning 2023 yil sentabrdagi anjumanida alifbodagi 4 harfni: O‘ o‘ — Õ õ, G‘ g‘ — Ğ ğ, Ch ch — C c, Sh sh — Ş ş almashtirish masalasi tahlil qilingandi.