Rossiya MSK Dunsova guruhini ro‘yxatga olish bo‘yicha yig‘ilishni qoldirdi

Rossiya Markaziy saylov komissiyasi prezidentlik saylovlarida rjyevlik jurnalist Yekaterina Dunsovaning nomzodini qo‘llab-quvvatlagan tashabbus guruhini ro‘yxatga olish bo‘yicha yig‘ilishni qoldirdi. Bu haqda 22 dekabr, juma kuni Dunsovaning o‘zi ma’lum qildi.

«Kecha men 22 dekabr kuni soat 15:00 ga rasmiy taklif oldim, lekin bugun saylov komissiyasi saytida bu masala 23 dekabr kuni soat 12:00 da kun tartibiga qo‘yilgan. Agar rad etilsa, takroriy yig‘ilishni o‘tkazishga ulgurmay qolamiz», - deydi u. 

Bundan tashqari, Dunsova MSK veb-saytida o‘z tashabbus guruhi va prezident Vladimir Putin guruhini ro‘yxatdan o‘tkazish bo‘yicha turli formulalarga e’tibor qaratdi. Jurnalistlar guruhi bo‘yicha bu - «arizani ko‘rib chiqish to‘g‘risida», amaldagi davlat rahbarida esa - «saylovchilar guruhini ro‘yxatga olish to‘g‘risida».

Adliya vazirligining rejadan tashqari tekshiruvi

Bir kun avval Dunsova Rossiya hukumati 20 dekabr kuni MSKga taqdim etilgan nomzodlik hujjatlarini obro‘sizlantirishga urinishidan xavotir bildirdi. Ayolning so‘zlariga ko‘ra, Rossiya Federatsiyasi Adliya vazirligi xodimlari 21 dekabr kuni rejadan tashqari tekshirish bilan kelgan, ular 17 dekabr kuni bo‘lib o‘tgan yig‘ilish bayonnomasi bilan qiziqqan. Putin tashabbus guruhi yig‘ilishi bayonnomasini tasdiqlagan notariusni tekshirishga hech kim kelmagan, deya ta’kidladi jurnalist.

Krasnoyarsklik Yekaterina Dunsova - jurnalist va ko‘ngilli qidiruv-qutqaruv guruhining koordinatori, Rjyev shahar dumasi deputati bo‘lib ishlagan. U 16 noyabr kuni prezidentlikka nomzodini qo‘yish niyatini ma’lum qildi va bu qarorini «so‘nggi o‘n yil davomida mamlakat noto‘g‘ri yo‘nalishda: taraqqiyot yo‘lida emas, balki o‘z-o‘zini yo‘q qilish yo‘lida ketayotgani» bilan izohladi. Dunsova urushni to‘xtatish, demokratik islohotlar va siyosiy mahbuslarni ozod etish tarafdori.  

Uch kunlik prezidentlik saylovlari

Rossiyada prezidentlik saylovlari 2024 yil 15-17 mart kunlari bo‘lib o‘tadi. Hozirgi davlat rahbari Vladimir Putin ham nomzod sifatida qatnashmoqda. 

Rossiya Liberal-demokratik partiyasi o‘z rahbari Leonid Slutskiyni oliy lavozimga nomzod qilib ko‘rsatdi, Rossiya Federatsiyasi Kommunistik partiyasi esa kommunistlar orasidan prezidentlikka Nikolay Xaritonov nomzodini qo‘llab-quvvatladi. Bundan tashqari, Davlat dumasining sobiq deputati Boris Nadejdin va Donetskdagi rossiyaparast ayirmachilarning sobiq harbiy rahbari Igor Strelkov (Girkin) saylovlarda qatnashish niyatini ma’lum qilgan.