Qizil dengizda 20 dan ortiq raketa va dron urib tushirildi

Yamanning Eron tomonidan qo‘llab-quvvatlangan husiychi isyonchilari Qizil dengizdagi savdo kemalariga yangi hujum uyushtirdi. 9 yanvar, seshanba kuni kechqurun AQSh qurolli kuchlari mintaqaviy qo‘mondonligi ma’lum qilishicha, AQSh va Buyuk Britaniya harbiy-dengiz kuchlari Qizil dengiz janubida xalqaro yuk tashish yo‘nalishlari va ulardagi o‘nlab savdo kemalari tomon otilgan 18 ta dron va 3 ta raketani urib tushirdi.

Xabarlarga ko‘ra, ehtimoliy qurbonlar yoki zarar haqida ma’lumot yo‘q. Ushbu ma’lumotlarga qaraganda, husiychilar hujum qilish uchun Eron tomonidan ishlab chiqarilgan OWA UAVS dronlari, kemalarga qarshi qanotli va ballistik raketalardan foydalangan. Ular Amerikaning USS Dwight D. Eisenhower, USS Gravely, USS Laboon, USS Mason, shuningdek, Britaniyaning HMS Diamond aviatashuvchisi tomonidan urib tushirilgan. 

Bu - o‘tgan yilning 19 noyabridan beri Qizil dengizdagi tijoriy yuk tashish yo‘nalishlariga husiychilarning 26-hujumi. 

Husiychilarning Qizil dengizdagi hujumlari va Prosperity Guardian xalqaro operatsiyasi 

Isroilning HAMAS guruhiga qarshi harbiy amaliyoti boshlanganidan so‘ng, Yaman husiychilari Qizil dengizda savdo kemalariga hujum qilmoqda. Isyonchilar o‘zlarining «G‘azo sektoridagi birodarlariga Isroil agressiyasi» to‘xtamagunicha, «dunyo bo‘ylab Isroil kemalariga hujum qilishda» davom etishini aytmoqda. Bir qancha yuk tashish kompaniyalari, xususan, Germaniyaning Hapag-Lloyd va Daniyaning Maersk, shuningdek, Mediterranean Shipping Company (MSC) und CMA CGM shirkati o‘z kemalarini Qizil dengiz va Arab dengizidagi Adan ko‘rfazini bog‘lovchi Bob al-Mandeb bo‘g‘ozi orqali jo‘natishni vaqtincha to‘xtatishini e’lon qildi.

18 dekabr kuni Qo‘shma Shtatlar eng muhim yuk tashish savdo yo‘llaridan birining xavfsizligini ta’minlash bo‘yicha Prosperity Guardian - «Farovonlik qo‘riqchisi» xalqaro operatsiyasi boshlanganini e’lon qildi, unda Pentagon, Bahrayn, Buyuk Britaniya, Ispaniya, Italiya, Kanada, Niderlandiya, Norvegiya, Seyshel orollari va Fransiya qatnashyapti. Shundan so‘ng yuk tashuvchi kompaniyalar Qizil dengiz va Adan ko‘rfazi orqali harakat tiklangani haqida xabar berdi.

Tinchlik davrida butun dunyo dengiz tashuvlarining 10-12 foizi, jahon neft tashuvlarining taxminan 5 foizi va konteyner tashuvlarining taxminan 30 foizi Qizil dengiz orqali o‘tadi.