Isroil garovga olinganlarni ozod qilish bo‘yicha kelishuvga erishdi - OAV

Kelishuv garovga olinganlarni bosqichma-bosqich ozod qilish, jangovar harakatlarni to‘xtatish, shuningdek, G‘azo sektoriga insonparvarlik yordamini yetkazishni nazarda tutadi.

Foto: AFP

Isroil, AQSh, Misr va Qatar vakillari G‘azoda o‘t ochishni to‘xtatish va garovga olinganlarni ozod qilish bo‘yicha yangi kelishuvga erishdi. NBC manbasiga ko‘ra, kelishuv loyihasi HAMAS vakillariga taqdim etiladi.

Parijda erishilgan kelishuvlar HAMAS tomonidan garovga olinganlarni bosqichma-bosqich ozod qilish, jangovar harakatlarni to‘xtatish, shuningdek, G‘azo sektoriga insonparvarlik yordamini yetkazishni nazarda tutadi. Buning evaziga Isroilda saqlanayotgan falastinlik mahbuslar ozod etilishi kutilmoqda.

Bundan oldin AP agentligi ismini oshkor etmagan yuqori martabali amaldorlarga tayanib, AQSh vakillari Isroil va HAMAS guruhi o‘rtasidagi muzokaralarda G‘azo sektoridagi janglarni to‘xtatish va garovga olinganlarni ozod qilish bo‘yicha kelishuv muzokaralarida muvaffaqiyatga erishganini yozgan edi.

«Taklif etilayotgan kelishuv urushni tugatmasa-da, AQSh rasmiylari bunday kelishuv mojaroni hal qilish uchun zamin yaratishiga umid qilmoqda», deyiladi matnda.

#Isroil #Hamas #G‘azo

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.