Shundan keyin Lukashenko Toshkentdagi Humo Arena muz saroyiga tashrif buyurdi.
Sport majmuasida belaruslik mehmonni O‘zbekiston prezidenti Shavkat Mirziyoyev kutib olgan.
Tanishuv chog‘ida ular Toshkentning «Humo» va Ostonaning «Nomad» hokkey jamoalari o‘rtasidagi uchrashuvni tomosha qilishdi. O‘yin yakunida oliy martabali mehmonlarga ularning ismlari tushirilgan hokkey liboslari topshirildi.
Tashrifning asosiy tadbirlari ertaga, 8 fevral kuniga rejalashtirilgan.
O‘zbekiston prezidenti matbuot xizmati bergan xabarga ko‘ra, tashrif dasturiga muvofiq oliy darajadagi muzokaralar o‘tkazilishi, ularda O‘zbekiston va Belarus o‘rtasidagi ko‘p qirrali hamkorlikni yanada kengaytirishning amaliy jihatlari ko‘rib chiqilishi rejalashtirilgan.
O‘zaro tovar ayirboshlashni oshirish, qishloq xo‘jaligi, yengil va oziq-ovqat sanoati, farmatsevtika, kommunikatsiyalar va boshqa tarmoqlarda kooperatsiya aloqalarini rivojlantirish masalalari diqqat markazida bo‘ladi.
Professional ta’lim, sog‘liqni saqlash, madaniyat, sport va turizm sohalarida sheriklikni rivojlantirish dasturlari ham muhokama qilinadi.
Muzokaralar yakunida ikki tomonlama hujjatlar to‘plamini qabul qilish ko‘zda tutilgan.
Shu kunlarda, tashrif arafasida Toshkent shahrida ikki mamlakat hududlari va tadbirkorlari ishtirokida qator ishbilarmonlik tadbirlari – Hududlararo forum va Ishbilarmonlar kengashi yig‘ilishi bo‘lib o‘tmoqda.
