Makron Ukrainaga yordam berishda qo‘shma harakatlarga chaqirdi

Fransiya prezidenti Emmanuel Makron Ukrainaga ko‘proq qurol va resurslar yetkazib berishga chaqirdi. Bu haqda u 26 fevral, dushanba kuni kechqurun Yelisey saroyida Ukrainaga yordam ko‘rsatish bo‘yicha konferensiya avvalida aytib o‘tdi. «Bugun hammamizning xavfsizligimiz tahdid ostida ekanligi haqida umumiy tushuncha bor», dedi Makron Fransiya prezidenti tashabbusi bilan Parijda yig‘ilgan 20 ga yaqin davlat va hukumat rahbarlari, jumladan, Kanada va AQSh vakillariga.

Uchrashuvda Germaniya kansleri Olaf Shols ham ishtirok etdi. Ukraina prezidenti Volodimir Zelenskiy Yelisey saroyidagi maslahatlashuvlar ishtirokchilariga video-aloqa orqali qo‘shildi.

Makronning so‘zlariga ko‘ra, Rossiya xatti-harakati hozir ham siyosiy darajada, ham Ukrainaga qarshi urush davrida keskinlashmoqda. «Rossiya yangi hujumlarga tayyorlanmoqda», dedi Fransiya prezidenti. Rossiyaning qat’iy pozitsiyasini muxolifat yetakchisi Aleksey Navalniy o‘limi, shuningdek, G‘arbdagi dezinformatsion kampaniyalar ko‘rsatdi, «demak, bu bizning xavfsizligimizga ham tegishli», deb ta’kidladi Makron. «Biz hammamiz jamoaviy harakat qilishimiz kerak», deya qo‘shimcha qildi u. 

«Rossiya urushda g‘alaba qozonmasligi kerak» va shuning uchun Ukraina tarafdorlari Ukrainaga yordam berish masalasida milliy darajada birgalikda harakat qilishi lozim, dedi Fransiya prezidenti uchrashuvda. «Biz bugun va ertaga xavfsizligimizni ta’minlash jarayonidamiz», dedi Makron va «rus xalqi bilan urush qilishni» istamasligini ta’kidladi. 

Shols Makronning «mojaro tomoni» bo‘lishni istamaslik pozitsiyasiga qo‘shildi

«Germaniya Ukrainaga Yevropadagi eng yirik harbiy yordam yetkazib beruvchi hisoblanadi. Bu o‘zgarishsiz qolmoqda», - deb yozgan Shols X ijtimoiy tarmog‘ida. - Ammo bir narsa aniq: biz to‘g‘ridan to‘g‘ri ham, bilvosita ham urush ishtirokchisi bo‘lmaymiz. Men barcha qarorlarimda shu ikki tamoyilga amal qilganman». Shols xabarga #Taurus heshtegini qo‘shdi va shu bilan Ukrainaga kerakli qanotli raketalarni yetkazib berishdan bosh tortganini tasdiqladi.

Kansler Germaniyaning urushga aralashish xavfini keltirib, Ukrainaga uzoq masofaga uchuvchi TAURUS qanotli raketalari hozir yetkazib berilishini qat’iyan rad etdi. «Biz hech qanday tarzda bu tizim erishadigan maqsadlar bilan bog‘lanmasligimiz kerak», dedi uning so‘zlarini keltiradi dpa.

Sholsning fikricha, shuning uchun ham bunday qurollarni topshirish masalasi hali kun tartibida emas. «Aniqlik ham zarur. Men bu ba’zi odamlarga hatto ta’sir qilmayotgani, ular bizning qilayotgan ishimiz urushda qandaydir ishtirok etishga olib kelishi mumkinligi haqida o‘ylamayotganidan hayratda qoldim», - dedi kansler. 

Parij konferensiyasining maqsadlari

Parij konferensiyasi «Ukraina xalqiga ham, Rossiya prezidenti Putinga ham Yevropa birligi va hamjihatligi signalini» yuborish imkoniyatini beradi, dedi Germaniya hukumati matbuot kotibi o‘rinbosari Kristian Xoffman. Makron maslahatchilarining so‘zlariga ko‘ra, Parijdagi maslahatlashuvlar nafaqat qurol-yarog‘ yetkazib berish bo‘yicha yangi kafolatlar, balki allaqachon va’da qilingan harbiy yordam samaradorligini oshirish, jumladan, ukrainalik askarlarni tayyorlash va kibermudofaani kuchaytirishga qaratilgan.

AFP xabariga ko‘ra, uning ishtirokchilari «Ukraina ehtiyojlariga moslashtirish» uchun Kiyevga yordamni oshirish yo‘llarini topishni maqsad qilgan. Biroq, yangi aniq majburiyatlar kutilmayapti, deya qayd etadi agentlik.

Fransiya so‘nggi paytlarda Ukrainaga Germaniyaga qaraganda sezilarli darajada kamroq harbiy yordam bergani uchun tanqid qilindi. O‘tgan yili Fransiya jami 2,1 milliard yevro miqdorida harbiy yordam berganini bildirgan. 2022 yilda bu ko‘rsatkich 1,7 milliard yevroni tashkil qilgan. Joriy yil uchun uch milliard yevrogacha va’da qilingan.