Qozog‘istonda suv toshqinlari ko‘lami kengaymoqda

Qozog‘istonning yetti viloyatida sel suvlari 5,5 mingdan ortiq uy va binolarni bosdi, deb xabar berdi 7 aprel, yakshanba kuni Favqulodda vaziyatlar vazirligi matbuot xizmati. «Aqmola, Aqto‘be, Atirau, Qo‘stanay, Pavlodar, Shimoliy Qozog‘iston va G‘arbiy Qozog‘iston viloyatlarida 3702 ta xususiy turar joy binolari, 562 ta hovlilar maydoni, 1822 ta qishloq uylari va 73 ta turli maqsadlardagi binolar suv ostida qolmoqda, 155 ta avtomobil yo‘llarida toshqinlar qayd etildi», - deyiladi bo‘lim xabarida.

Departament ma’lumotlariga ko‘ra, suv toshqini zonalaridan 72 284 kishi, jumladan 17 217 nafar bolalar qutqarilgan va evakuatsiya qilingan. Uylari suv ostida qolgan 14 430 nafar qozog‘istonlik vaqtinchalik joylashtirish markazlarida. Yo‘llarning yorilishi oqibatida 61 ta aholi punkti transport aloqasidan mahrum bo‘lib qolgan, deb xabar qilmoqda Favqulodda vaziyatlar vazirligi.

80 yil ichidagi eng yirik tabiiy ofat

Qozog‘istondagi suv toshqinlari miqyosi va oqibatlari bo‘yicha so‘nggi 80 yildagi eng yirik tabiiy ofatga aylandi, dedi kuni kecha prezident Qosim-Jo‘mart To‘qayev fuqarolarga murojaatida. U hozirgi vaziyatni «ko‘p yillar davomida kuzatilmagan» tabiiy ofat deb atadi.

Mamlakatning o‘nta viloyatida, jumladan Qozog‘iston g‘arbidagi Atirau viloyatida mahalliy favqulodda holat rejimi e’lon qilindi.