28 aprel kuni O‘zbekistondagi ilk informatsion telekanal – UzReport TV tashkil etilganiga 10 yil to‘ldi.
Telekanal O‘zbekistonda birinchilardan bo‘lib Reuters, Bloomberg, CCTV kabi xalqaro axborot agentliklari va Discovery, National Geographic loyihalari bilan hamkorlikni yo‘lga qo‘ygan.
24 soat efirga uzatiladigan telekanal 2014 yilda tashkil etilgan bo‘lsa, UzReport axborot agentligi 1999 yildan buyon faoliyat olib boradi.
Prezident administratsiyasining axborot siyosati departamenti rahbari Komil Allamjonov yubiley munosabati bilan Ravshan Jo‘rayev, Gulnoza Husanova boshchiligidagi ijodiy jamoani tabrikladi.
“So‘z erkinligi, ma’lumotlarning xolis va tezkor yetkazilishi, odamlarning axborotga bo‘lgan ehtiyojini qondirish borasida katta hissangiz bor. Islohotlar va jamoatchilikni qiziqtirgan masala-muammolarning yoritilishida o‘zgacha, professional yondashuvingiz bilan ajralib turasiz.
Nazarimda, xuddi yaqinda paydo bo‘lgan telekanal edi, vaholanki, mana, oradan 10 yil o‘tibdi. Telekanal 100 yoshga to‘lganda ham, o‘z auditoriyasini yo‘qotmasin”, – deya yozdi Allamjonov Telegram-sahifasida.
