London birinchi marta rossiyalik oligarxning muzlatilgan mablag‘larini olib qo‘ydi

Britaniya birinchi marta daromadlar to‘g‘risidagi qonunga muvofiq sanksiyalangan mablag‘larni musodara qilmoqda. Jinoyatchilik bilan kurashish agentligi (NCA) 29 iyul, dushanba kuni rossiyalik oligarx Petr Avendan 780 ming funt sterling (taxminan 925 ming yevro) musodara qilinishini ta’minlaganini ma’lum qildi.

Aktiv boshqaruvchisi Aven pullarini o‘tkazishga rozi bo‘ldi 

Qayd etilganidek, Aven aktivlari boshqaruvchisi Stiven Geyter bu pulni Britaniya rasmiylariga sanksiyalardan bo‘yin tovlash bo‘yicha tergovni yakunlash uchun berishga rozi bo‘lgan. NCA va Geyter o‘rtasidagi kelishuv kunning boshida Vestminster magistratura sudi tomonidan tasdiqlangan. 

Mablag‘lar Aven nomiga rasmiylashtirilmagan, ammo unga tegishli bo‘lgan va shuning uchun 2022 yilda Rossiyaning Ukrainaga hujumidan keyin Rossiya hukumatini qo‘llab-quvvatlagani uchun Britaniya tomonidan kiritilgan sanksiyalar tufayli muzlatib qo‘yilgan, deyiladi bayonotda. 

Britaniya sanksiyalari buzilishi 

Britaniya departamenti ma’lumotlariga ko‘ra, Britaniya jazo choralari pul o‘tkazishga urinishlar, shuningdek, Aven aktivlari boshqaruvchisi tomonidan 2022 yil 15 martdan keyin amalga oshirilgan tranzaksiyalar bilan buzilgan. Boshqa narsalar qatorida, bu Avenning 20 dan ortiq uy xodimlariga maosh to‘lash va 160 ming funt sterlinglik Bentley Bentayga avtomobilini sotish bilan bog‘liq. 

NCA Aven mablag‘larini xatlovga olish qarorini departamentning murakkab va uzoq davom etgan tergovining muhim natijasi deb atadi. «Bu NCA’ning Britaniya sanksiyalar rejimiga rioya etilishini ta’minlash va davlat hamyoniga noqonuniy ushlab qolingan pullarni qaytarish majburiyatini namoyish etadi», deyiladi bayonotda.

«Alfa-grupp» asoschilaridan biri Petr Aven Rossiya qo‘shinlarining Ukrainaga hujumidan ko‘p o‘tmay, Yevropa Ittifoqi va Britaniya, 2023 yil avgustida esa AQSh sanksiyalari ostida qoldi. U 2022 yilda sanksiyalarni buzgani uchun tergov qilinganidan keyin Britaniyani tark etgan. OAV ma’lumotlariga ko‘ra, London rasmiylari Avenga oyiga 60 ming funt sterling (70 ming yevro) miqdorida nafaqa to‘lashni ma’qullagan va bu summaning 50 ming yevroga yaqini Aven moliyaviy menejerining qo‘riqlash kompaniyasiga o‘tkazilgan, u tadbirkorga jarimalardan qochishda yordam ko‘rsatgani uchun tergov qilinmoqda.

2024 yil aprel oyida YeI sudi Petr Aven, shuningdek, uning sherigi Mixail Fridmanga nisbatan sanksiyalarning bir qismini bekor qildi.