WSJ: AQSh Kursk operatsiyasiga ehtiyotkor optimizm bilan qaramoqda

Ukraina Kursk viloyatidagi barcha maqsadlariga qisman erishdi, deb yozadi Amerikaning The Wall Street Journal nashri 25 avgust, yakshanba kuni. Qayd etilishicha, Kursk operatsiyasi Ukraina Rossiyaning harbiy qudratini to‘xtata olmaydi, degan hukmron qarashlarni o‘zgartirib yubordi.

Amerika rasmiylari nuqtayi nazaridan, Kursk operatsiyasining uchta asosiy maqsadi bor: Rossiyani Ukraina sharqidan qo‘shinlarini olib chiqishga majburlash, jang maydonidagi mag‘lubiyat haqidagi tasavvurni rad etish va tinchlik muzokaralari oldidan Ukrainaning pozitsiyasini yaxshilash. «Ayni damda uchta maqsadga ham qisman erishildi», — deyiladi nashrda. Bundan tashqari, WSJ yana bir yutuq - rossiyalik harbiy asirlar sonining ko‘payishi haqida yozadi. 

Zelenskiyning jasur va xavfli harakati

Nashrning qayd etishicha, Ukraina oldingi jangovar harakatlardan farqli o‘laroq, amaliyot tafsilotlarini G‘arbdan sir tutgan. WSJ Ukraina qurolli kuchlari Kursk viloyatidagi hujumini Zelenskiy tomonidan Rossiyani muvozanatdan chiqarishi, qo‘shinlarni ko‘chirishga majburlashi, G‘arbni Ukrainani qurol-yarog‘ bilan yanada qat’iyroq qo‘llab-quvvatlashga undashi, shuningdek, jasur va xavfli harakati deb ataydi.

Endilikda, nashrga ko‘ra, Oq uy Zelenskiyning harakati o‘zini oqlaydimi yoki yo‘qmi, ehtiyotkor optimizm bilan kutmoqda. «Qo‘shma Shtatlar Ukrainaga operatsiya o‘tkazish uchun joy ajratmoqda, shu bilan birga, bu masalada jamoatchilik muhokamasidan qochishga harakat qilmoqda», deb yozadi WSJ. Shu bilan birga, Pentagon rasmiylarida Zelenskiy Kursk viloyatidagi operatsiya maqsadlaridan biri deb atagan «bufer zonasi» bo‘yicha, xususan, Ukraina bu zonani kengaytirishni rejalashtirayotgani yuzasidan savollar bor.

Shu bilan birga, Vladimir Putin Kursk viloyatida sodir bo‘layotgan voqealarning ahamiyatini har tomonlama kamaytirmoqda, deb yozadi WSJ. Xususan, nashrning qayd etishicha, Putin bu haqda rossiyaliklarga murojaat qilmagan.