Yarim asrda birinchi marta: Singapurda sobiq vazir pora olgani uchun qamaldi

Singapurda korrupsiya bo‘yicha shov-shuvli ish yakunlandi. Sobiq transport vaziri Subramaniam Isvaran 12 oylik qamoq jazosiga hukm qilindi.

O‘tgan hafta Isvaran to‘rtta modda bo‘yicha aybiga iqror bo‘ldi. Shundan uchtasi 280 000 dollarlik pora bilan bog‘liq. Xususan sobiq vazir futbol bo‘yicha Angliya Premer ligasi o‘yinlari va Londondagi Vest-End teatriga chiptalar, xususiy samolyotda sayohat, Brompton lyuks velosipedi va Singapurdagi Formula 1 Gran-prisiga chipta ko‘rinishidagi qimmatbaho sovg‘alar olgan.

Yana bir ayblov odil sudlovga to‘sqinlik qilish bilan bog‘liq.

Isvaran o‘tgan yilning iyulida qamoqqa olingandi, so‘ng garov evaziga qo‘yil yuborildi. Yanvar oyida prokuratura unga poraxo‘rlik va korrupsiya bilan bog‘liq 27 ta ayblov qo‘ydi. Isvaran iste’foga chiqdi, lekin ayblovlarni rad etdi. Keyinchalik u yirik biznesmen On Ben Sendan pul va mahalliy kompaniya direktoridan sovg‘a olganini tan oldi.

Prokuratura uni olti oydan yetti oygacha ozodlikdan mahrum qilishni talab qildi. Sud esa qattiqroq hukm chiqardi.

13 yil Vazirlar Mahkamasi a’zosi bo‘lgan Isvaran bilan bog‘liq hodisa o‘z hukumatini korrupsiyadan xoli deb hisoblaydigan Singapurni larzaga soldi. Shahar-davlat muntazam ravishda dunyodagi eng kam korrupsiyalashgan mamlakatlar o‘ntaligidan joy olib keladi. Shuningdek, u Osiyodagi korrupsiyasiz davlatlar qatorida yetakchi o‘rinni egallaydi.

Isvaran yarim asr ichida poraxo‘rlik aybi bilan tergovga tortilgan birinchi vazir bo‘ldi. Bundan oldingi o‘xshash holat 1986 yilda yuz bergandi: o‘shanda milliy taraqqiyot vaziri Tex Chean Van korrupsiyada gumonlangan. Biroq unga rasman ayblov qo‘yishga ulgurishmagan, chunki u o‘z joniga qasd qilgandi.