Ravon R2 камлитражли автомобиллар савдоси бўйича ноябрь рейтингини бошқармоқда

Россияда ноябрь ойида энг кўп сотилган камлитражли автомобиль сифатида Ravon R2 модели қайд этилган, дея хабар қилмоқда «Автостат Инфо». Ўтган ойда, таҳлилчиларнинг маълумотларига кўра, РФда жами 190 дона Ўзбекистонда ишлаб чиқилган автомобиль сотилган. 

Ихчам автомобиллар сегментида иккинчи ўринни Жанубий Корея вакили KIA Picanto эгаллаган. Бу машинадан 91 дона сотилган бўлиб, бир йил аввалги кўрсаткичдан 20,2 фоизга кам демакдир. Ноябрь ойидаги камлитражли автомобиллар етакчи учлигидан, шунингдек, Daewoo Matiz ҳам ўрин олган. Унинг савдоси 8,1 фоизга пасайган ва бир ойда жами 68 та машина сотилган. Ноябрь ойи якуни бўйича ТОП-5 сегментига Smart Fortwo (61та, ўтган йилга нисбатан +177,3 фоиз) ва Smart Forfour (57та) моделлари ҳам кира олган.

«Автостат Инфо» ҳисоботидан маълум бўлишича, A-таснифидаги автомобиллар савдо ҳажми ноябрь ойида ўтган йилги кўрсаткичдан 119,4 фоизга ўсган ва 474 донани ташкил этган. Шунга қарамай, жорий йилнинг 11 ойи бўйича 4,23 фоизлик пасайиш кузатилмоқда ва ўтган давр мобайнида 3451 дона шу таснифдаги автомобиль сотилган.