Марсдаги музлаган кўл сурати олинди

Марсда 15 йилдан бери ишлаётган «Марс-Экспресс» зонди Қизил сайёрадаги катта ҳажмдаги муз билан қопланган Королёв кратерининг батафсил суратларини олди. Бу суратлар Европа космик агентлиги сайтида жойлаштирилган.

Зонд 2003 йил 2 июнда Бойқўнғир космодромидан учирилиб, Марсга ўша йилнинг 25 декабрида етиб борган ва ўшандан бери Марс атрофидаги орбитада ҳаракатланиб юради. Қурилма Марсни тадқиқ қилишдан ташқари, унинг йўлдоши Фобос ҳақида кўплаб маълумотлар тўплаган.

Олимларнинг фикрича, Марс сиртида бир пайтлар дарёлар, кўллар ва океанлар мавжуд бўлган. Бу сувнинг катта қисми сайёранинг атмосфераси каби коинотга буғланиб кетган. Ушбу сувнинг кичик қисми Марсда мўътадил ва қутболди кенгликларда музликлар кўринишида сақланиб қолган.

Ушбу сув захиралари вақти-вақти билан эриб, буғланади, сўнгра сайёранинг совуқроқ бурчакларига ёғингарчилик кўринишида тушади.

Қизил сайёрадаги музнинг энг катта захираларини диаметри 82 кмлик Королёв кратерида кўриш мумкин. Бугунги кунда бу кратер улкан ҳажмдаги муз билан тўлган. Бу музнинг қалинлиги сайёрадаги йилнинг энг совуқ фаслида 2 кмгача етади. Сайёрашунослар фикрича, бу музлик кратернинг совуқ туби ва сиртидаги илиқроқ жинслар ўртасидаги катта фарқ ҳисобига сақланади.