Тошкент давлат иқтисодиёт университетида плагиат урчигани танқид қилинди

Шавкат Мирзиёев парламентга мурожаатномасида яна бир бор олий таълим тизими ва Тошкент давлат иқтисодиёт университетидаги ҳолатни танқид қилди.

Фото: ТДИУ расмий сайти

«Тошкент давлат иқтисодиёт университетининг ректорини ишдан олганимизда аттестация ўтказдик. Олийгоҳдаги ўқитувчиларнинг 60 фоизи ўтолмади. Тасаввур қилинг, улар шунча вақт нимани ўқитган? Билими бўлмаса қандай билим берган?

Ҳолбуки биз катта текширув ўтказмагандик. Ўзининг фани бўйича берилган саволларга жавоб бера олмади», дея қайд этди президент.

Давлат раҳбари олийгоҳда плагиат ҳолатлари ҳақида айтиб ўтган.

«Қаерни қандай тугатганини аниқламоқчи бўлиб 27тасининг диссертацияларини текширдик. 20 йилда кўчирилган диссертациялар», дейди Шавкат Мирзиёев.

Эслатиб ўтамиз, ноябрь бошида иқтисодиёт университетида «катта тозалаш» ишлари бошлангани ҳақида хабар берилган эди. Университетнинг аввалги ректори Баҳодир Ҳодиев ишдан олиниб, унинг ўрнига Олий ва ўрта махсус таълим вазирининг биринчи ўринбосари Конгратбой Шарипов тайинланганди.

Президент бироз аввалроқ Сенатнинг илк ялпи мажлисидаги чиқишида ҳам Тошкент давлат иқтисодиёт университетидаги ҳолатни танқид қилганди.

#парламентга мурожаат #Шавкат Мирзиёев #Тошкент давлат иқтисодиёт университети