1 октябргача Ўзбекистонга цемент олиб киришда божхона божи тўланмайди

Фармонга кўра, уй-жойлар нархини арзонлаштириш мақсадида 2021 йил 1 апрелдан янги тартиб доирасида:

• кўп квартирали уй-жойлар қишлоқ жойларда 5 ва ундан юқори қаватли, шаҳарларда 9 ва ундан юқори қаватли, монолит темир-бетон ва йирик панелли конструкциялар ҳамда бошқа қурилиш материаллари асосида массив шаклида қурилади;
• уй-жой қурувчи ташкилотлар учун мўлжалланган цемент ҳамда металл прокати бўйича алоҳида биржа савдо секцияси жорий қилинади;
• 2021 йил 1 октябргача цемент маҳсулотини (ТИФ ТН коди 2523) Ўзбекистонга олиб киришда божхона божининг ноль ставкаси қўлланилади.

2021 йил 1 майгача якка тартибдаги уй-жойларнинг намунавий лойиҳалари ишлаб чиқилиб, Қурилиш вазирлиги расмий веб-сайтида жойлаштирилади.

Шунингдек, президент имзолаган янги фармонда 2021 йил давомида республикада 33 мингдан ортиқ квартира ва якка тартибдаги уй-жойлар ипотека кредитлари асосида берилиши белгиланган.

Аввалроқ, президент ўтказган йиғилишда қурилиш сифатини ошириш масъулияти бош вазир ўринбосари Очилбой Раматов зиммасига юклатилганди. «Цемент ишлаб чиқариш бу йил 16-17 миллион тоннага етказилади. Аммо қурилишлар ҳажми ҳам икки баробар ортади ва бизда 40 миллион тоннага яқин цемент зарурати бўлади», деган ҳукумат расмийси.