Янги Зеландия бош вазирининг тўйи омикрон сабаб қолдирилди

Янги Зеландия бош вазири Жасинда Ардерн мамлакатда коронавирус инфекциясининг омикрон штамми тобора кенг тарқалаётгани сабаб ўз тўйини қолдиришга қарор қилди. Бу ҳақда сиёсатчи эпидемиологик вазиятга бағишланган матбуот анжуманида маълум қилган.

Фото: AP

24 январдан бошлаб Янги Зеландияда омикрон кенг тарқалаётгани сабаб хавфлиликнинг қизил даражаси эълон қилинган. Шу муносабат билан оммавий тадбирларда кўпи билан 100 киши иштирок этишига рухсат берилади. Агар вакцина олмаган одамлар йиғилса, меҳмонлар сони 25 нафаргача чекланади.

«Шунақа бўлиб қолди, мен минглаб янги зеландияликлардан фарқ қилмайман. Фуқаролар пандемия давомида оғир касал бўлиб қолган яқинларини кўра олишмади. Бу мен ҳис қилаётганимдан анча ёмон туйғу эди», деди Янги Зеландия етакчиси.

Жон Ҳопкинс университети маълумотларига кўра, 5 миллиондан ортиқ одам яшайдиган Янги Зеландияда 15,5 мингдан ортиқ одамда коронавирус аниқланган ва 52 киши ҳалок бўлган. Мамлакатда пандемия бошидан буён 9 миллион доза вакцина ишлатилган.

42 ёшли Жасинда Ардерн 2018 йил июл ойида Кларк Гейфорддан қиз фарзандли бўлганди. 2019 йил сиёсатчи ҳамроҳи билан унаштирилганини эълон қилган. Жасинда Ардерн давлат раҳбари сифатида кўзи ёриган Беназир Бҳуттодан (Покистон собиқ бош вазири) кейин иккинчи аёл сиёсатчи ҳисобланади.

#Янги Зеландия #Жасинда Ардерн

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.