Пластик ифлосланиш: денгиз жониворларининг 900 дан ортиқ тури хавф остида

Уларнинг айтишича, Ассенцион оролининг жануби-ғарбий қирғоғида топилган ахлат Хитой, Япония ва Жанубий Африкага тегишли.

Лондон зоология жамияти (ЗСЛ) жамоаси беш ҳафта давомида у ердаги пластик ифлосланиш даражасини баҳолади.

Уларнинг хабар беришича, денгиз жониворларининг 900 дан ортиқ турлари хавф остида.

Ассенцион оролида қуруқлик қисқичбақаси, фрегат қуши ва турли хилдаги акула, тошбақа, балиқ ва денгиз қушлари каби пластик ифлосланишдан зарар кўрган кўплаб турлар мавжуд.

ЗСЛ денгизни муҳофаза қилиш гуруҳининг денгиз биологи Фиона Ллевелин ББСга берган интервьюсида шундай дейди: “Пластмасса ажойиб материал, лекин у ҳеч қачон йўқолиб кетмайди. Оролнинг пластмасса билан тўлган ҳолатини кўриб юрагим эзилиб кетди. Уларнинг аксарияти бошқа жойдан келганини фаҳмлаш қийин эмас”. Шунингдек, биолог йирик брендлар ва ҳукуматлар тартибсизлик учун жавобгарликка тортилиши кераклигини қўшимча қилди.

Ллевелин хоним ва унинг ҳамкасблари экспедиция давомида пляждаги битта бошпанада 1000 дона пластик чиқиндиларини ва жами 7000 дан ортиқ бўлакларни топдилар.

Аҳолиси бор-йўғи 800 киши бўлган кичик орол экологик инқироздан хавотирда. Ҳайвонлар пластмассани ютиб юборишади, бу эса зарар етказиши мумкин. Микропластмассалар ва уларнинг озиқ-овқат занжирида қандай ишлаши ҳақида ташвишлар кучаймоқда.

Орол қирғоқларида йиғилиб қолган пластмасса уюмлари орасида пластик бутилкалар, синган қаттиқ пластик бўлаклар, балиқ овлаш асбоблари ва сигарет қолдиқлари мавжуд.

Табиат ҳимоячилари одамларни чиқиндиларни ташлаб кетмасликка, табиатни асрашга чақиришмоқда.