Мариуполни қайта қураётган россиялик олигарх АҚШда яшаши маълум бўлди

Россиялик миллиардер Алексей Репик АҚШда яшаб, Мариуполда қурилиш билан шуғулланади. У Россия томонидан босиб олинган ва вайрон қилинган Украина шаҳрининг асосий қурувчилардан бири - "Р-Строй" компаниясига эгалик қилади. Бу ҳақда 16 май, сешанба куни россиялик мухолифатчи Иля Яшин тарафдорлари томонидан чоп этилган Scanner Project лойиҳаси видеосида айтилади.

Уларнинг сўзларига кўра, "Р-Фарм" фармацевтика компанияси асосчиси Алексей Репик мансабдор шахслар билан шахсий алоқалари туфайли онкологик касалликларни даволаш учун дори-дармонларни оширилган нархларда сотган. Украинада кенг кўламли уруш бошланганидан сўнг, у шахсий санкциялардан қўрқиб, ушбу компаниядаги улушини учта харидорга сотди, улар орасида онаси Валерия Даева ҳам бор эди.

Даева компанияси Украина босқинидан кейин ташкил этилган "Р-Строй" фирмасини молиялаштиради, унинг логотипи "Р-Фарма" логотипига жуда ўхшайди. "Компания босиб олинган ҳудудларда ишлаш учун ташкил этилган ва Репик билан боғлиқ шахслар номига рўйхатдан ўтган", - дейди суриштирув муаллифлари.

Алексей Репикнинг ўзи бир неча йиллардан бери АҚШда истиқомат қилади, Сан-Францискода унинг қиймати 19,1 миллион долларлик тўрт қаватли уйи бор, дея хабар беради Scanner Project. Олигархнинг тўрт фарзандидан камида уч нафари АҚШда туғилган. 2017 йилда Репик Доналд Трампнинг инаугурация маросимида қатнашган. Репикнинг бойлиги 1,4 миллиард долларга баҳоланмоқда. 2023 йил феврал ойида у санкция рўйхатига киритилган.