Ҳиндистон қуёшни ўрганиш учун космик станция учирди

Ҳиндистонда Aditya-L1 қуёшни ўрганиш бўйича автоматик станция муваффақиятли учирилди. Ҳиндистон космик тадқиқотлар ташкилоти (ISRO) 2 сентябр, шанба куни маълум қилишича, PSLV C57 (Polar Satellite Launch Vehicle) ракета ташувчиси бортидаги станция билан  Бенгал кўрфазидаги Шрихарикота оролида жойлашган миллий космодромдан парвоз қилган.

«Қурилма сунъий йўлдошни мўлжалланган орбитага аниқ олиб чиқди. Ҳиндистоннинг биринчи қуёш обсерваторияси Қуёш-Ер тизимининг L1 нуқтасига (Лагранж нуқтаси ҳудудидаги гало-орбита) саёҳатини бошлади», дейилади хабарда.

L1 Ердан тахминан 1,5 миллион км узоқликда жойлашган. Станция Ерга яқин орбитада 16 кун бўлиши, кейин эса L1'га яна 110 кун учиши керак. Агар миссия муваффақиятли бўлса, у ҳолда станция қуёшнинг қоронғиликсиз доимий кузатувига эга бўлади.

Ҳиндистоннинг биринчи қуёш тадқиқот миссияси

Aditya-L1 - қуёшни ўрганиш бўйича биринчи ҳинд миссияси. Унинг асосий мақсадлари - қуёшнинг хромосфераси ва тожини ўрганиш, магнит майдони ва зарралар оқимини ўлчаш. Бортда еттита асбоб бор – тўрттаси масофадан зондлаш ва учтаси жойида кузатиш учун.

Бу - Ҳиндистоннинг жорий йилги иккинчи космик миссияси. 14 июл куни «Чандраян-3» станцияси бортида «Прагян» луноходи билан Ойга учирилди. Август ойи бошида у Ой атрофидаги орбитага чиқарилди. 23 август куни «Чандраян-3» кам ўрганилган Жанубий қутб ҳудудига Ҳиндистон тарихида биринчи марта юмшоқ қўнишни амалга оширди, бу ерда олимларнинг фикрига кўра, музли сув захиралари бўлиши керак.