«Нархоз» ва Молия институти пойтахт марказидан кўчирилиши кутилмоқда

Тошкент давлат иқтисодиёт университети ва Тошкент молия институти шаҳар марказидан Сергели туманига кўчирилиши мумкин.

Пойтахт ҳокимияти матбуот хизмати мутахассиси Гулноза Қосимованинг Kun.uz сўровига жавобан берган маълумотига кўра, ҳақиқатан ҳам масъулларда шундай режа бор.

"Бунинг режаси ҳозирча муҳокамада, бундай [олийгоҳ бинолари кўчирилиши] эҳтимол бор, лекин аниқ қарор йўқ ҳали.

Лойиҳа бор, тасдиқланмаган. Мен ҳам [бу лойиҳани] кўрмаганман, давлат раҳбари тасдиғидан ўтадиган лойиҳа экан. Агар тасдиқланса, албатта бўлишамиз", — деди у.

Таълим муассасаларини марказдан бошқа жойга кўчириш таклифини ким бергани ва бунга эҳтиёж нимадан пайдо бўлгани ҳақидаги саволлар очиқ қолди.

Тошкент давлат иқтисодиёт университети Ислом Каримов шохкўчасида, Молия институтининг бош биноси эса Амир Темир шохкўчасида жойлашган. ОТМларнинг бўшатиладиган бинолари кейинги тақдири маълум эмас.