Тергов қўмитаси «Крокус»даги терактда 137 киши ҳалок бўлганини маълум қилди

62 жасаднинг шахси аниқланган. Жароҳатланганлар сони 180 нафарга етган.

Фото: Москва области губернатори матбуот хизмати

Москва шаҳри яқинидаги «Крокус Сити Ҳолл» концерт залида содир этилган теракт оқибатида ҳалок бўлган 137 кишининг жасади топилган, ҳудудни кўздан кечириш ишлари давом эттирилмоқда. Бу ҳақда Тергов қўмитаси хабар берди.

Айни вақтга келиб 62 жасаднинг шахси аниқланган, қолганлари бўйича экспертиза ўтказилмоқда.

Тергов қўмитаси хабарига кўра, теракт жойида тўртта комплект жанговар аммуниция, иккита Калашников автомати ва 500 дан ортиқ патрон топилган. Миналаштирилган жасадлар ёки миналаштирилган буюмлар аниқланмаган.

Идора яқин вақтлар ичида теракт содир этишда гумонланувчиларни ҳибсга олиш тўғрисида судга мурожаат қилиши ҳақида маълум қилган.

Бунгача теракт қурбонлари сони 133 нафар экани айтилаётганди. ФВВнинг Москва области бўйича бошқармаси 152 киши жароҳатлангани ҳақида маълум қилганди.

Москва области соғлиқни сақлаш вазирлигининг аниқлик киритишича, теракт оқибатида жабрланганлар сони 180 кишини ташкил этмоқда.

#теракт #Крокус Сити Ҳолл

Россиянинг Москва вилояти, Красногорск шаҳридаги «Крокус Сити Холл» концерт залида отишма юз берди. Маҳаллий ОАВ хабарларига кўра, номаълум шахслар автомат милтиқдан одамларга қарата ўқ узган.