Туркия БМТ судида Исроилга қарши даъвога қўшилди

Туркия Ғазо секторида Исроилнинг Фаластиннинг ҲАМАС ҳаракатига қарши уруши юзасидан Халқаро судда Исроилга қарши ЖАР даъвосига қўшилди. Туркия парламенти делегацияси Бирлашган Миллатлар Ташкилотининг Ҳаагадаги олий судига «Туркия Фаластин муаммосини ҳал қилишга катта аҳамият бераётганини» акс эттирувчи «аралашув баёноти»ни тақдим этди, деб ёзди Туркия ташқи ишлар вазири Хоқон Фидан 7 август, чоршанба куни Х платформасидаги микроблогида.

Жанубий Африканинг Исроилга қарши даъвоси

Жанубий Африка Республикаси декабр ойида Халқаро судга Исроилга қарши даъво аризаси билан мурожаат қилган. У Исроилни Ғазо секторидаги геноцидда айблади. Январ ойи охирида суд Исроилга «геноцид»нинг олдини олишни буюрган дастлабки қарорни чиқарди. Май ойида Халқаро суд Исроилдан Ғазо сектори жанубидаги Рафаҳдаги ҳарбий амалиётини зудлик билан тўхтатишни, июн ойида эса Исроилга қарши геноцид содир этганликда айбловларни текшириш учун БМТ махсус вакилига операция ҳудудларига киришни таъминлашни талаб қилди.

Жанубий Африканинг Исроилга қарши даъвосига аввалроқ Никарагуа, Колумбия, Ливия, Мексика, Фаластин маъмурияти ва Европа Иттифоқига аъзо Испания қўшилган эди. Халқаро суд қарорлари қонуний кучга эга эмас, лекин жаҳон саҳнасида Исроилга босимни кучайтириши мумкин.

Исроил-Фаластин можароси

7 октябр куни эрталаб ҲАМАСнинг ҳарбий қаноти - «Иззаддин ал-Қассам бригадалари» Исроилга қарши «Ал-Ақсо тўфони» операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди. 

ҲАМАСнинг билдиришича, операция босиб олинган Шарқий Қуддусдаги Ал-Ақсо масжидига бостириб кириш ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган. Бунга жавобан Исроил армияси Ғазо секторида ҲАМАСга қарши ўнлаб қирувчи самолётлардан фойдаланган ҳолда «Темир қиличлар» операцияси бошланганини эълон қилди.

Исроил-Фаластин можароси авж олгандан бери 40 мингга яқин фаластинлик ҳалок бўлди. Исроилда қурбонлар сони 1400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.