Пентагон Украинага қўшимча ёрдам ажратди

АҚШ Мудофаа вазирлиги Украинага қўшимча хавфсизлик ёрдамини эълон қилди. 9 август, жума куни АҚШ Мудофаа вазирлиги Пентагон захираларидан янги транш ажратилиши ҳақида хабар берди.

125 миллион доллар (114 миллион евро)га баҳоланган пакет ҳаво ҳужумидан мудофаа тизимлари, душман артиллериясини аниқлаш ва унга қарши курашиш учун кўп мақсадли радарлар ҳамда танкка қарши қуролларни ўз ичига олади.

Тақдим этиладиган жиҳозлар орасида Stinger ракеталари, HIMARS ялпи ўт очиш реактив тизимига ўқ-дорилар, 155 мм ва 105 мм артиллерия ўқ-дорилари, кўп мақсадли радарлар, TOW танкка қарши ракета тизими, Javelin ва AT-4 танкка қарши тизимлари, юқори ҳаракатчан кўп мақсадли ғилдиракли тез тиббий ёрдам машиналари, ўқ отиш қуроллари, бузиш ускуналари, миллий инфратузилмани ҳимоя қилиш учун ускуналар ва ёрдамчи ускуналар киради.

Қўшма Штатлар 50 га яқин иттифоқчи ва ҳамкорлари билан Киевни Россия ҳужумига қарши курашиш учун ресурслар билан таъминлашда давом этяпти.

Тизимлар имкон қадар тезроқ ишга туширилади

Давлат департаменти эслатишича, бу АҚШ президенти Жо Байден Украинага хавфсизлик бўйича қўшимча маблағлар тўғрисидаги қонун имзолангандан бери украинларга ўнинчи хавфсизлик ёрдам пакетидир. Тизимлар имкон қадар тезроқ ишга туширилади, дея қўшимча қилди идора.

Вашингтондаги НАТО саммити якунлари бўйича Киевга бир йил давомида 40 миллиард доллар (36 миллиард евро) миқдорида ҳарбий ёрдам кўрсатиш тўғрисида қарор қабул қилинди.

13 июн куни АҚШ ва Украина президентлари Жо Байден ва Володимир Зеленский Украина етакчиси ҳам таклиф этилган G7 саммити чоғида 10 йилга мўлжалланган икки томонлама хавфсизлик шартномасини имзолади.