Қозоғистонда вебкам расман тақиқланди

Tengrinews хабарига кўра, ўзгартиришлар 5 июл куни имзоланган «Одам савдосига қарши курашиш тўғрисида»ги қонунда назарда тутилган. Жиноят кодексига янги тушунча - «шаҳвоний характердаги бошқа хизматлар» киритилмоқда.

«Шаҳвоний характердаги бошқа хизматлар деганда, даромад ёки мулкий фойда олиш мақсадида бошқа шахснинг шаҳвоний эҳтиёжини (эҳтиросини) қондиришга қаратилган ҳаракатларни, шу жумладан реал вақт режимида телекоммуникация тармоқлари, шу жумладан Интернет орқали амалга ошириш тушунилади», дейилади Жиноят кодексида.

Энди «шаҳвоний характердаги бошқа хизматлар» деганда фойда олиш мақсадида амалга ошириладиган ва бошқа шахснинг шаҳвоний эҳтиёжларини қондиришга қаратилган ҳар қандай ҳаракатлар тушунилади. Бунга Интернет орқали масофадан туриб, масалан, видеотрансляция орқали тақдим этиладиган хизматлар киради. Жиноят кодексининг бир неча моддалари ушбу ибора билан тўлдирилган.

Вебкам (веб-камера) - бу одамлар реал вақт режимида видео трансляция қиладиган фаолият. Ушбу ўзгаришлар контекстида веб-камера Интернет орқали шаҳвоний хизматларни тақдим этишни англатади, бунда модел фойдаланувчиларнинг илтимосига биноан камера олдида шаҳвоний ҳаракатларни амалга оширади.

2023 йилда Қозоғистон Ички ишлар вазирлиги ва Миллий хавфсизлик қўмитаси томонидан модел агентлиги ниқоби остида порнографик контент тайёрлаш ва тарқатиш билан шуғулланган йирик жиноий гуруҳга қарши махсус операция ўтказилди. Жиноятчилар ижтимоий тармоқлар орқали қозоғистонлик ёш қизларни ўз сафига қўшиб, ойига 2 миллион тенге маош ва тўлиқ махфийликни ваъда қилган. Қизлар ишлашдан бош тортса, уларга босим, шантаж ва жарима солинган.

Гуруҳдаги роллар аниқ тақсимланган: ташкилотчилар, ёлловчилар, маъмурлар, IT мутахассислари ва бухгалтерлар. Охирги беш йил ичида жиноий ташкилотнинг айланмаси 3 миллиард тенгедан ошган. Полиция Остона, Олмаота, Чимкент, Ақтўбе ва Қарағандада кечаю-кундуз интим характердаги онлайн трансляциялар олиб бориладиган 79 та офис ва квартирани аниқлади. Операция натижасида 118 киши қўлга олинган эди.

Қонунга киритилган ўзгартиришларга кўра, қуйидагилар учун жиноий жавобгарлик жорий этилади:

- шахсларни, шу жумладан вояга етмаганларни шаҳвоний характердаги бошқа хизматларни курсатишга жалб этиш, шунингдек бу мақсадларда қўшмачилик қилиш;

- фоҳишабозликни тарғиб қилиш ва (ёки) реклама қилиш, ушбу фаолиятга жалб қилиш мақсадида шаҳвоний характердаги бошқа хизматлар, шунингдек қўшмачилик мақсадида;

- телекоммуникация тармоқлари, шу жумладан интернетдан фойдаланган ҳолда фоҳишалик уйларини ташкил қилиш ёки сақлаш, шаҳвоний характердаги бошқа хизматларни кўрсатиш ва қўшмачилик қилиш.