ЎзЛиДеП: “Қудратли янги Ўзбекистонни биргаликда қурамиз!”

“Очиқ осмон остидаги музей” дея эътироф этилган Хива шаҳрида ўтказилган тадбирда мингдан зиёд тадбиркорлар, фермерлар, таълим, тиббиёт, маданият ва санъат соҳаси вакиллари, партия фаоллари ҳамда талаба ёшлар иштирок этди.

Тарғибот тадбирида партиянинг келгуси беш йилликдаги устувор вазифалари, барча соҳа ва йўналишларни қамраб олган сайловолди дастуридаги вазифалар муҳокама қилинди.

Таъкидланганидек, партия сайловолди дастурида рақамли иқтисодиёт, инновацияларни ривожлантириш, сунъий интеллектдан унумли фойдаланишни рағбатлантирувчи ҳуқуқий ва молиявий шароитларни яратиш, рақамли саноатни жадал ривожлантириш дастурлари қабул қилиш таклифини илгари сурмоқда. Рақамли технологияларга ихтисослашган корхоналарнинг экспорт фаолиятини жадаллаштириш, “Чип саноати”, сунъий интеллект, нанотехнологиялар ва шу каби замонавий илғор тармоқларни ривожлантириш бўйича дастур ишлаб чиқиш юзасидан партиянинг аниқ режалари тўғрисида фикр юритилди. Шунингдек, партия чекка ҳудудларда таълим ва соғлиқни сақлаш ташкилотларидаги юқори малакали мутахассислар учун тиббий хизмат кўрсатиш, қўшимча таътил кунлари, саёҳат учун тўловлар, уй-жой ижарасини ўз ичига олган “Ижтимоий пакет” тизимини жорий этишни таклиф этмоқда.

Бундан ташқари, ЎзЛиДеП шифокорларни хорижий мамлакатларга тажриба алмашиш учун давлат ҳисобидан юборишда нодавлат тиббиёт ташкилотлари шифокорлари учун ҳам квоталар ажратиш, давлат тиббий суғуртаси билан бирга нодавлат тиббий суғурта тизимини жорий этишни муҳим ташаббус сифатида илгари сурмоқда.

Тадбир сўнгида иштирокчилар бўлажак сайловларда ЎзЛиДеПни қўллаб-қувватлаб овоз беришга чақирилди. Тарғибот тадбири машҳур санъаткорларнинг куй-қўшиқларига уланиб кетди.

Реклама