Миробод прокурори электр энергиясини тежаш бўйича рейд ўтказди. Тармоқ соатига 19 980 сўмлик юкламадан халос қилинган

Тошкент шаҳри Миробод тумани прокурори Бобур Абдуллаев раҳбарлигида туман прокуратураси ва мутасадди идоралар ходимларидан тузилган ишчи гуруҳ энергоресуслар беҳуда сарфланишининг олдини олиш юзасидан рейд тадбирлари ўтказди. Бу ҳақда туман ҳокимлиги ахборот хизмати хабар берди.

“Тадбир давомида кундуз куни чироқ ва реклама воситаларида электр энергиясидан асоссиз фойдаланган юридик истеъмолчиларга нисбатан 10 та маъмурий баённома тузилиб, 22,2 кВт энергоресурслар тежалиши таъминланди”, – дейилади хабарда.

Тушунтириш ишлари олиб борилиши натижасида 30га яқин юридик истеъмолчилар томонидан камчиликлар жойида бартараф этилиб, электр энергияси беҳуда сарфланишига чек қўйилган. Бундай турдаги рейд тадбирлари давом эттирилади, дея қайд этган ҳокимлик.

Таъкидлаш лозим, юридик шахслар учун жорий тарифда (1 kWh – 900 сўм) 22,2 kW электр энергиясининг қиймати – соатига 19 980 сўмни ташкил этади.

Маълумот учун, прокурорлар ўз вазифаларидан ташқари 2-сектор раҳбари сифатида ўз ҳудудида ижтимоий-иқтисодий сиёсатни амалга оширишга ҳам бевосита масъул қилиб қўйилган.

• Маъмурий жавобгарлик тўғрисидаги кодекснинг 100-моддасига кўра, электр ва иссиқлик энергиясини беҳуда сарфлаш – мансабдор шахсларга 5–15 БҲМ (1 млн 875 минг сўмдан 5 млн 625 минг сўмгача) жарима солишга сабаб бўлади.
• Худди шундай ҳуқуқбузарлик маъмурий жазо қўлланганидан кейин бир йил давомида такрор содир этилса, жарима миқдори 15–30 БҲМгача ошади.

Эслатиб ўтамиз, ўтган ойда “Энергияни тежаш, ундан оқилона фойдаланиш ва энергия самарадорлигини ошириш тўғрисида”ги қонун кучга кирган эди.