Тошкентда 2,7 млрд сўмлик электрдан ноқонуний фойдаланиш ҳолати аниқланди

Тошкент шаҳрида 3 та қоидабузарлик натижасида тизимга 2 млрд 747 млн сўмлик зарар етказилгани аниқланди.

Фото: Ўзэнергоинспекция

“Ўзэнергоинспекция” хабар беришича, Шайхонтоҳур туманида “Б.” уй-жой ширкати жами 17 дона электр ҳисоблагичдан 9 тасига ташқи таъсир кўрсатган ҳолда 726 млн сўмлик электр энергиясидан ноқонуний фойдаланган.

Олмазор туманида “Ф.Т.” МЧЖ фойдаланилган электр энергияси учун ҳисоб-китобларни амалга оширмаган. Натижада таъминот корхонасига 1 млрд 159 млн сўм зарар етказилган.

Олмазор тумани О.Бобожонов кўчаси, 20-уй манзилидаги турар жой биносининг электр ҳисоблагичи ҲЕТ Billing тизимига киритилмасдан фойдаланилган. Натижада таъминот корхонасига 862,2 млн сўмлик зарар етказилган.

Мазкур ҳолатлар юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилди.

#Тошкент #электр