ГФРда суриялик қочқинлар украиналиклардан камроқ экани аниқланди

Германияда 1,3 миллионга яқин суриялик истиқомат қилади. 12 декабр, пайшанба куни Германия Федерал статистика бошқармаси ҳисоботида маълум қилинишича, улардан фақат ярми (712 минг) бошпана изловчилардир.

2023 йил охирида сурияликлар Германиядан бошпана сўраб мурожаат қилганларнинг 22 фоизини ташкил қилган. Улар Германиядаги қочқинлар сони бўйича украиналиклардан (тахминан 1,65 миллион) кейин иккинчи ўринда туради.

Суриялик қочқинларнинг ярмидан кўпи 2014–2016 йилларда келган, уларнинг 12 фоизи, яъни 85 мингга яқини Германияда туғилган болалардир.

Германияда қанча суриялик бор?

Германияда жами суриялик 1,3 миллионга яқин киши бор. Уларнинг тахминан 18 фоизи Германияда туғилган. Деярли 17 фоизи Германия фуқаролигига эга. «Суриядан миграцион келиб чиқиши бўлганлар сони бу ердан бошпана сўраган сурияликлар сонидан сезиларли даражада кўп», — деб хабар берди статистика идораси.

Германияга кўчиб ўтган сурияликларнинг ўртача ёши 23 ёшни ташкил қилади. Бу уларнинг кўпчилиги нима учун иш топа олмаслигини тушунтиради. Германияда меҳнатга лаёқатли ёшдаги сурияликларнинг атиги 42 фоизи ишлайди. «Сабаблардан бири шундаки, суриялик муҳожирларнинг катта қисми ўртача ёши паст бўлгани учун ҳамон таълим олади», — дейилади ҳисоботда.

Германия Сурияни қўллаб-қувватлаш шартларини эълон қилди

Германия ташқи ишлар вазири Анналена Бербок 11 декабр куни Башар Асад режими ағдарилганидан кейин Сурияни қўллаб-қувватлаш режасини тақдим этди. У Берлин Дамашққа ёрдам бериш учун илгари сурадиган саккиз банд ва шартдан иборат.

Бербок ҳокимиятнинг тинч йўл билан ўтказилишини биринчи ва энг муҳим нуқта деб атади. «Барча партиялар томонидан қабул қилинган фуқаролик ҳукумати фақат барча озчиликлар ва сиёсий гуруҳлар стол атрофида жам бўлса, муваффақиятли бўлади», деди у.

Иккинчи ўринда - Сурия ичидаги мулоқот. Германия Ташқи ишлар вазирлиги раҳбарининг сўзларига кўра, у БМТ резолюциялари ва «жойлардаги воқеликлар»га мувофиқ чет эл аралашувисиз, масалан, Туркия ёки Исроил аралашувисиз ўтиши керак. «Сурия яна хорижий давлатлар ўйинида пиёдага айланмаслиги керак», деди Бербок.

Учинчиси, «Ҳайъат Таҳрир аш-Шом» (ҲТШ) аъзолари томонидан аёллар, этник ва диний озчиликлар ҳуқуқларини ҳурмат қилиш. Бербокнинг айтишича, Германия гуруҳ билан «ҳали тўғридан тўғри алоқага эга эмас», аммо Берлин унинг «Ал-Қоида» билан алоқаси борлигини билади. «Биз ҲТШни унинг ҳаракатларига қараб баҳолаймиз», деди вазир.

У, шунингдек, инсонпарварлик инқирозини имкон қадар тезроқ ортда қолдириб, Сурияни қайта тиклашни бошлашга чақирди. Бербок сиёсий инқироз фонида мамлакатда юқори инфляция ҳақида маълум қилди, шунинг учун асосий озиқ-овқат маҳсулотлари қимматлашмоқда. Мисол учун, нон нархи бир неча кун ичида 900 фоизга ошди. Вазир Германиядан 8 миллион евролик шошилинч ёрдам ваъда қилди.