Қўшимча функционаллар
-
Тунги кўриниш
ГФР полицияси мамлакат бизнесини РФ диверсияси таҳдиди ҳақида огоҳлантирди
Reuters агентлигининг хабар беришича, Федерал жиноий полиция бошқармаси Германиядаги компанияларни Кремл топшириғи билан амалга оширилаётган диверсиялар, кузатув ва бошқа зарарли фаолиятлар хавфи ҳақида огоҳлантирган.
Фото: Susann Prautsch/dpa/picture alliance
Германияда Федерал жиноий полиция бошқармаси (BKA) мамлакат корхоналарига Россия манфаатлари ва кўрсатмалари билан содир этилиши мумкин бўлган қўпорувчилик ҳаракатлари ҳақида огоҳлантириш билан мурожаат қилди. Бу ҳақда Reuters 19 декабр, пайшанба куни агентлик кўриб чиқишга муваффақ бўлган махфий ҳужжатга таяниб ёзмоқда.
Таъкидланишича, Россия ҳукумати топшириқларини бажарувчи шахслар томонидан эҳтимолий зарарли ҳаракатлар доираси кенг: кузатув ва ташвиқотни тарқатиш билан боғлиқ ҳуқуқбузарликлардан диверсияларгача. Германия жиноий полициясига кўра, охирги ҳолатда корхоналарнинг муҳим инфратузилмаси зарар кўриши мумкин.
ГФРда РФнинг қандай зарарли ҳаракатларидан қўрқишяпти?
Шу билан бирга, BKA компанияларни рухсатсиз фото ва видеога олиш, компания ҳудудига рухсатсиз кириш ёки граффити ёзиш каби унчалик оғир бўлмаган ҳуқуқбузарлик ҳолатларида ҳушёр бўлишга чақиради. Афтидан, полиция ўт қўйиш ёки портлаш содир бўлишини истисно қилмаяпти.
Шу муносабат билан мактубда сўнгги ойларда ҳарбий объектлар, СТГ ёки нефт терминаллари, денгиз портлари ва логистика компаниялари устидан қайд этилган номаълум дронларнинг парвозлари кўрсатилган.
Бошқа нарсалар қаторида, корхоналар тажовузкорларнинг ўз ходимлари билан ижтимоий тармоқлар орқали алоқа ўрнатишга уринишлари ҳақида огоҳлантирилмоқда.
Reuters эслатишича, Россия томони Ғарбда диверсиялар содир этганлик ҳақидаги барча айбловларни қатъиян рад этади. Россиянинг Берлиндаги элчихонаси журналистларга изоҳ бермади.
