Rossiyaning sobiq vaziri Ulyukayevga yakuniy ayblov e'lon qilindi

Rossiya tashqi iqtisodiy rivojlanish vazirligining sobiq rahbari Aleksey Ulyukayevga yakuniy tahrirdagi ayblov e'lon qilindi. Unga nisbatan "davlat lavozimini egallagan shaxs tomondan o‘ta yirik miqdorda pora olish" moddasi bo‘yicha jinoiy ish qo‘zg‘atilgan. Bu haqda Rossiya tergov qo‘mitasi rasmiy vakili Svetlana Petrenko ma'lum qildi.

Ulyukayev 2016 yil noyabrida 2 mln dollar pora olayotgan vaqtda qo‘lga olingan. Bu  pullar "Rosneft"ga "Bashneft"ga tegishli davlat ulushini sotib olishga imkon beruvchi vazirlik xulosasi uchun mo‘ljallangan. 

2017 yil yanvarda Ulyukayev uy qamog‘iga olingan va Smolensk viloyatida unga tegishli bo‘lgan 10 ta yer maydoni va turar joyga taqiqlov qo‘yilgan. Rossiya prezidenti Vladimir Putin uni ishonchni yo‘qotgani tufayli o‘z lavozimidan bo‘shatgan. 

Aprelda Moskvaning Basman sudi Ulyukayevning uy qamog‘i muddatini 15 iyulgacha cho‘zgan va unga kuniga 2 soatdan sayr qilishga ruxsat bergan. Ulyukayevning o‘zi esa unga nisbatan yengilroq jazo qo‘llanishini so‘ragan. U ateroskleroz, qon bosimi bilan aziyat chekishi sababli salomatligi risoladagidek emasligidan shikoyat qilgan. Ulyukayevning himoyasi unga sayr qilishga ruxsat berilishini talab qilgan, keyinroq esa uni shifoxonaga yotqizish kerakligini ma'lum qilgan. 

Ulyukayev Rossiyaning zamonaviy tarixida korrupsiya uchun hibsga olingan ilk federal vazir bo‘ldi. U 15 yilgacha ozodlikdan mahrum etilishi mumkin.