Nyu-York aeroportida tirik kobralar solingan jo‘natma aniqlandi

Jon Kennedi nomidagi Nyu-York xalqaro aeroportida bojxonachilar ichida 5 ta tirik qirol kobrasi va 3 ta gekkon (kaltakesak turi) bo‘lgan jo‘natmani aniqlashdi.

"Interfaks" axborot agentligining mahalliy OAVga iqtibos keltirgan holda xabar berishicha, jo‘natma aeroportning pochta bo‘limi ko‘zdan kechirilganda aniqlangan. U Gonkongdan jo‘natilgan bo‘lgan.

Ma'lum qilinishicha, ilon va gekkonlar AQShning baliq zaxiralari va yovvoyi jonzotlarni qo‘riqlash xizmatiga topshirilgan.   

Qirol kobralari zaharli ilonlar bo‘lib, ularning uzunligi 6 metrgacha yetishi mumkin.