Buxoroda kurash bo‘yicha O‘zbekiston chempionati o‘tkazilyapti

O‘zbekiston Kurash federatsiyasining taqvim rejasiga asosan, 23 fevral kuni Buxoroda kattalar o‘rtasida respublika chempionati boshlandi.

Erkaklar va ayollar o‘rtasida o‘tkaziladigan musobaqalarga Buxoro viloyatida katta tayyorgarlik ko‘rildi. 22 fevral kuni barcha ishtirokchilar Buxoro temir yo‘l vokzalida tantanali tarzda kutib olindi. 

23 fevral kunidan Buxoro olimpiya zaxiralari kollejida 60kg va 66kg vazn toifalarida, shuningdek, 48kg, 52kg va 57kg vazn toifalarida ayollar o‘rtasida bellashuvlar boshlangan.

Mazkur nufuzli musobaqa O‘zbekistondagi eng kuchli polvonlarni aniqlash bilan birgalikda, joriy yil Indoneziyaning Jakarta shahrida o‘tadigan Osiyo o‘yinlariga o‘ziga xos tayyorgarlik vazifasini o‘taydi.     

Chempionatda 1999 yilgacha tug‘ilgan erkak va ayol polvonlar ishtirok etadilar. 14ta hududiy jamoalarga har bir vaznda 4 nafardan ishtirokchi bilan qatnashishga ruxsat berilgan. 

Musobaqa 25 fevralgacha davom etadi.