Avtomashinani olib qochgan shaxs maktab o‘quvchisi ekani ma'lum bo‘ldi

Surxondaryo viloyatining Qumqo‘rg‘on tumanida shu yil 29 sentabr kuni noma'lum shaxs Bog‘aro mahallasi hududida qarovsiz qoldirilgan R.I.ga tegishli “Kobalt” avtomashinasini haydab qochgan. 

O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabariga ko‘ra, olib borilgan qidiruv ishlari natijasida avtomashina “Xalqobod” MFY hududidan texnik soz holda topilgan. 

Holat yuzasidan jinoyat ishi qo‘zg‘atilgan. Ko‘rilgan choralar natijasida ushbu jinoyatni Boymoqli mahallasida yashovchi 14-sonli o‘rta maktabning 10-sinf o‘quvchisi J.G. sodir etganligi aniqlanib, ushlangan. 

Tergov davom etmoqda.