Plastik chiqindilarni qayta ishlab universal xomashyo olish usuli topildi

Singapur milliy universiteti olimlari oddiy plastik idishlardan turli sohalarda foydalanish mumkin bo‘lgan maxsus aerogellar tayyorlash yo‘lini topishdi.

Ikki yil davomida tadqiqot olib borgan dotsent Xay Min Duong va professor Nxan fan-Txiyen boshchiligidagi olimlar guruhi plastik idishlar asosini tashkil etuvchi polietilentereftalatdan aerogel olish texnologiyasini ishlab chiqishdi. 

Olimlarning aytishicha, bitta plastik idishdan A4 o‘lchamdagi aerogel varag‘ini tayyorlash mumkin.

«Aerogel tarkibiga turli aralashmalar qo‘shish orqali turli xomashyolar olishimiz mumkin. Masalan, metil guruhini qo‘shib unga sorbent xususiyatini taqdim etamiz. U suv havzalarini neftdan tozalashda asqotadi. Yoki boshqa qo‘shimcha qo‘shsak, aerogel olovga chidamli va issiqlikni tutib turuvchi moddaga aylanadi. Undan uylar devorlariga qoplama yoki o‘t o‘chiruvchilar kiyimlari uchun mato tayyorlash mumkin. Bularning barchasini biz oddiy plastik chiqindilardan tayyorlay olamiz!», - dedi ixtirochilardan biri.