YeOII davlatlaridan piyoz, sarimsoq va guruch olib chiqilishi taqiqlandi

Bu haqda Yevrosiyo iqtisodiy komissiyasi (YeOIK) kollegiyasi bayonotida aytilgan.

“YeOIK kollegiyasi yig‘ilishi natijalariga ko‘ra, YeOII davlatlaridan bir qator oziq-ovqat mahsulotlari olib chiqilishini vaqtincha taqiqlashga qaratilgan choralar qabul qilindi. Bu mahsulotlar orasida piyoz, sarimsoq, sholg‘om, guruch, grechka, javdar, tariq, yorma, yirik tortilgan un, grechkadan tayyor oziq-ovqat mahsulotlari, maydalangan va maydalanmagan soya dukkagi va kungaboqar urug‘i bor. Ularning olib chiqilishi 30 iyungacha taqiqlanadi”, deyilgan xabarda.

YeOIKning ushbu qarori chop etilgandan 10 kun o‘tgach kuchga kiradi. Bayonotda aytilishicha, taqiqlovning kiritilishi YeOII davlatlari aholisini koronavirus pandemiyasi sababli sanitar-epidemiologik vaziyat yomonlashgan vaqtda yuqorida tilga olingan mahsulotlar bilan yetarlicha miqdorda ta'minlash imkonini beradi.

Ayni vaqtda YeOII tarkibiga Armaniston, Belarus, Rossiya, Qirg‘iziston va Qozog‘iston kiradi.