Guljahon Yo‘ldosheva ishi bo‘yicha jami 5 kishiga hukm o‘qildi

5 aprel kuni jinoyat ishlari bo‘yicha Chirchiq shahar sudida Toshkent viloyati yuqumli kasalliklar shifoxonasi sobiq bosh shifokori Guljahon Yo‘ldosheva va boshqalarga sud hukmi o‘qildi.

Sud hukmi bilan, Guljahon Yo‘ldosheva Jinoyat kodeksining:

• 167-moddasi 2-qismi «a, b, v, g» bandlari (rastrata yo‘li bilan talon-toroj qilish);
• 207-moddasi 3-qismi «a» bandi (mansabga sovuqqonlik bilan qarash);
• 209-moddasi 2-qismi «a» bandi (mansab soxtakorligi)da nazarda tutilgan jinoyatlarni sodir etgan deb topildi.

Shifokor, shuningdek, JKning 25,167-moddasi 3-qismi «a» bandi bilan ham ayblangan edi, ammo u ushbu ayblov bo‘yicha sud tomonidan JPKning 83-moddasi 1-qismiga asosan reabilitatsiya qilindi.

Yo‘ldosheva 3 yil muddatga mansabdorlik va moddiy javobgarlik yuklatiladigan lavozimlarda ishlash huquqidan mahrum qilinib, 4 yil muddatga ozodlikni cheklash jazosiga hukm qilindi.

Unga nisbatan soat 22:00dan 06:00gacha yashash joyini tark etmaslik, ruxsatsiz yashash joyini o‘zgartirmaslik kabi cheklovlar kiritildi.

Sud hukmi bilan, sudlanuvchi Sheyxnazar Ro‘zmetov (shifoxonaning sobiq infeksionist shifokori) JKning 116-moddasi 3-qismi, 228-moddasi 2-qismi «a, b» bandlari, 228-moddasi 3 qismida nazarda tutilgan jinoyatlar sodir etganlikda aybdor deb topildi.

Sh.Ro‘zmetov tayinlangan jazolarni qisman ko‘shish yo‘li bilan 1 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilinib, 3 yil muddatga ozodlikni cheklash jazosiga hukm qilindi.

Sh.Ro‘zmetov 2020 yil 4 oktyabrda ushlanib, 2020 yil 22 oktyabrga qadar qamoqqa olish ehtiyot chorasi ko‘llanilganini inobatga olib, tayinlangan ozodlikni cheklash jazosi muddatidan 18 kunni chegirib, o‘tash uchun unga 1 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilib, 2 yil 11 oy 12 kun muddatga ozodlikni cheklash jazosi tayinlandi.

Sudlanuvchi Jahongir Ziyodullayev (shifoxona sobiq reanimatologi) JKning 116-moddasi 3-qismi, 28,228-moddasi 2-qismi «b» bandida nazarda tutilgan jinoyatlarni sodir etganlikda aybdor deb topildi.

J.Ziyodullayevga JKning 228-moddasi 3-qismi bilan e'lon qilingan ayblov o‘z tasdig‘ini topmagani sababli u mazkur modda bo‘yicha JPKning 83-moddasi 3-qismiga asosan reabilitatsiya qilindi.

Tayinlangan jazolarni qisman ko‘shish yo‘li bilan Jahongir Ziyadullayevga 2 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilib, 3 yil 6 oy muddatga ozodlikni cheklash jazosi tayinlandi.

Yana bir sudlanuvchi Alisher Dadamatov JKning 167-moddasi 2-qismi «b, v, g» bandlarida nazarda tutilgan jinoyatlarni sodir etganlikda aybdor deb topildi.

Unga nisbatan JKning 45-moddasi qo‘llanilib, 2 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilinib, oylik ish haqining 20 foizini davlat daromadi hisobiga ushlab qolgan holda 2 yil muddatga axloq tuzatish ishlari jazosi tayinlandi.

A.Dadamatov JKning 25,167-moddasi 3-qismi «a» bandi bilan ham ayblangan, ammo ushbu ayblov bo‘yicha sud tomonidan JPKning 83-moddasi 1-qismiga asosan reabilitatsiya qilindi.

Janar Akimova JKning 167-moddasi 2-qismi «b, v, g» bandlarida nazarda tutilgan jinoyatlarni sodir etganlikda aybdor deb topildi.

Unga nisbatan JKning 45-moddasi qo‘llanilib, 2 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilinib, oylik ish haqining 15 foizini davlat daromadi hisobiga ushlab qolgan holda 2 yil muddatga axloq tuzatish ishlari jazosiga hukm qilindi.

Shuning bilan sud ishi yopiq deb e'lon qilindi.